Čytajcie: «Ty suprać Łukašenki». U Breście mužčyna ŭdaryŭ miedyka na vačach milicyjaniera VIDEA
Tut.by adšukaŭ mužčynu, jaki ŭdaryŭ doktara ŭ bresckaj balnicy. Heta Mikałaj Vakulič, jamu 55 hadoŭ, žyvie ŭ Bresckim rajonie, pracuje kiroŭcam školnaha aŭtobusa. Jon pahadziŭsia vykłaści svaju viersiju padziej. Kaža, 5 studzienia znachodziŭsia ŭ Breście, byŭ pjany, «zvaliŭsia na prypynku, raźbiŭ hałavu».
— Da mianie padyšli dva amapaŭcy — vietlivyja chłopcy, vyklikali chutkuju dapamohu.
Tak mužčyna trapiŭ u pryjomnaje adździaleńnie balnicy.
— A ŭ mianie takaja palityka — ja za ciapierašniuju ŭładu, za prezidenta. Čaho im nie chapaje [pratestoŭcam]? Narmalna ž žyviom!
Mužčyna viedaje pra pratesty miedykaŭ u Biełarusi, hetaj źjavaj jon nie zadavoleny. Raspavioŭ, što ŭ pryjomnym adździaleńni staŭ kazać supracoŭnikam chutkaj dapamohi, što jon dumaje pra heta i pra Łukašenku — kab samoha nie pryniali za pratestoŭca.
— Miedyki mnie skazali: «Za kaho ty, za kaho?» I stali mianie tuzać, adzin uziaŭ za šyju! Kali b jany mianie nie patuzali, ja b nikoha nie ŭdaryŭ!
Što ŭkładvaje mužčyna ŭ słova «tuzać», padrabiaźniej daviedacca nie ŭdałosia.
Paśla kanfliktu, jaki trapiŭ na videa, u balnicy Mikałaju akazali dapamohu.
— Apracavali ranu, abśledavali i adpuścili. Na druhi dzień mnie patelefanavaŭ učastkovy i skazaŭ, što treba sustrecca.
Pra toje, što videa ź jaho pavodzinami ŭžo šyroka razyšłosia ŭ sacyjalnych sietkach, mužčyna viedaje.
— Mnie, viadoma, soramna, niajomka, ale ŭžo jak jość.
Naprykancy jon dadaŭ, što svaich palityčnych pierakanańniaŭ praciahnie prytrymlivacca.
