Siamja Šarendaŭ — bieraściejskija aktyvisty. Pakul muž byŭ na sutkach, na žonku zaviali kryminalnuju spravu. Padstavaj dla raźbiralnictva stała videa, dzie jana nibyta abraziła milicyjantaŭ, kali tyja zatrymlivali muža. Ale ŭ SIZA žančyna trapiła zusim pa inšym artykule.
Andrej Šarenda i Palina Šarenda-Panasiuk
«Paznajomilisia ŭ «Maładym froncie»
Andrej i Palina paznajomilisia 15 hod tamu.
«My tady byli ŭ «Maładym froncie». Paśla zdaryłasia Płošča-2006, dzie my razam stajali. Chiba z hetaha času ŭ nas zaviazałasia siabroŭstva, jakoje paśla pierajšło ŭ bolš ščylnyja adnosiny», — uspaminaje mužčyna.
Palina raniej uznačalvała bieraściejski «Małady front», była kaardynatarkaj pa vobłaści ruchu «Zubr». A ŭ 2010 hodzie ŭdzielničała ŭ vybarčaj kampanii Andreja Sańnikava.
«Paśla tych vybaraŭ mnie daviałosia źjechać amal na hod u emihracyju ŭ Polšču. Ja vučyŭsia i pracavaŭ tam, Palina była adna z synam», — dzielicca jaje muž.
Jon i ciapier čas ad času jeździć u Polšču ŭ zarobki: byŭ administrataram hatela, nabiraŭ inšych padpracoŭvak. Palina paśla dekretu aformiła samazaniataść jak repietytar polskaj movy. Zajmałasia ź dziećmi i darosłymi, brała pierakłady.
U siamji dvoje synoŭ — Słavamir (11 hod) i Stach (4 hady). Chłopcy razmaŭlajuć pa-biełarusku, choć i naviedvajuć ruskamoŭnyja sadok i škołu.
«U Breście jość biełaruskamoŭnyja kłasy, ale jany znachodziacca ŭ inšaj častcy horada i tudy daloka dabiracca. Ja liču, pavinny najpierš baćki padavać prykład, pytańnie škoły — druhasnaje. Sa starejšym było tak, što jon, naadvarot, kiepska pa-rusku razmaŭlaŭ», — uśmichajecca Andrej.
U efiry BT nazvała Łukašenku dyktataram
Ź pieraśledam siamja sutykałasia i ŭ 2017-m, paśla maršaŭ darmajedaŭ. Za vyviešvańnie raściažki na ich zaviali kryminalnuju spravu — nibyta za źniavahu prezidenta.
«Jana ničym nie skončyłasia, praź miesiac jaje zakryli. Nam namiakali, što heta była sproba vypichnuć nas za miažu, sistema zapužvańnia».
Na apošnich parłamienckich vybarach Palina stała kandydatam u deputaty ad hramadzianskaj kampanii «Jeŭrapiejskaja Biełaruś». Jana zapomniłasia zvarotam na telebačańni, u jakim nazvała Łukašenku dyktataram.
«Moj vystup byŭ adnym ź pieršych, i jany jašče, napeŭna, prosta nie paśpieli ŭklučyć usie svaje filtry. Ja tekst papiarednie prynosiła na fłešcy. Rabotniki TB litaralna za siekundu pierad zapisam prybiehli z razdrukavanym vystupam. Aburalisia słovu «dyktatar», maŭlaŭ, što heta paklop, abraza. Ja tłumačyła, što heta palitałahičny termin», — raskazvała tady aktyvistka, jak abyšła cenzuru ŭ efiry. Paśla takoha zvarotu jaje, kaniečnie, źniali z parłamienckaj honki.
U hetu vybarčuju kampaniju para vystupała za pieramieny. Ź leta Andrej adsiedzieŭ bolš za 60 sutak. Pieršy raz jaho zatrymali jašče ŭ lipieni — za akcyju salidarnaści z Babarykam jamu dali 15 sutak.
«Jany skančvalisia 11 žniŭnia. Pa papiery mianie vyzvalili, ale nasamreč navat ź IČU nie dali vyjści, puścili na kanviejer z usimi, nibyta za supraciŭ pry vychadzie. Dali jašče 10 sutak. Pakazalna, što kali 16 žniŭnia mnohich vyzvalali, mianie nie vypuścili, ja dasiadzieŭ usie svaje sutki».
Nastupny raz Andreja ŭziali na maršy ŭ Breście 6 vieraśnia. Tady jamu dvojčy prysudzili pa 15 sutak. A žoncy, jakuju taksama zatrymali, — štraf 20 bazavych.
Apošniaja historyja, jakaja skončyłasia dla siamji pieratrusam i kryminalnaj spravaj, pačałasia 29 śniežnia.
«Dumaju, za mnoj sačyli. Uviečary ja vyjšaŭ pahulać z małodšym synam, i tut padbiehli dva supracoŭniki milicyi. Skazali: patelefanujcie ŭ damafon, kab zabrali dzicia, i projdziem z nami. Kali mianie zatrymlivali, Palina źniała videa. Jana nazyvała ich fašystami, inšymi słovami.
U mianie visieŭ ściah na bałkonie. Spačatku kazali, što praz heta pačali pravierku ŭ ramkach administracyjnaj spravy. Ale minuła troje sutak, nijakich ruchaŭ nie było, mnie začytali vusnaje papiaredžańnie za ściah. I prynieśli novy pratakoł — za ŭdzieł u mienskaj akcyi 8 listapada. U mianie byli fotazdymki ŭ fejsbuku z hetaha maršu».
«Kožnuju ranicu syn biažyć da łožka i pytajecca, dzie mama»
Tym časam 3 studzienia ŭ kvateru Šarendaŭ pryjšli z ahladam — z-za taho videa, na jakim Palina źniavažliva vykazvałasia pra milicyjantaŭ (jano trapiła ŭ telehram-kanały). Što tam adbyvałasia, Andrej daviedaŭsia ad susiedziaŭ.
«Pryjechali dźvie mašyny. Supracoŭniki AMAPa kuvałdaj vybili dźviery. U hety čas u kvatery znachodzilisia žonka i čatyrochhadovy syn. Ahlad nahadvaŭ razhrom. Zabrali noŭtbuk, sistemny błok starejšaha syna, fłeški, prystaŭku ad telebačańnia, kvadrakoptar — navahodni padarunak małoha. Vyniali niekatoryja dakumienty, usie suvieniry ź bieł-čyrvona-biełaj simvolikaj i «Pahoniaj». I dziva, što zabrali našy z Palinaj dypłomy ab vyšejšaj adukacyi — jany ŭ ramkach visieli.
Palinu aryštavali. Spačatku advieźli ŭ IČU: ja taksama znachodziŭsia tam i čuŭ, jak jaje dastaŭlali — brescki izalatar nie taki vialiki. Dziaciej nie adabrali, jany pajechali da babuli. Choć na sudzie supracoŭniki milicyi mnie kazali: a my nie viedajem, dzie dzieci, chutčej za ŭsio ŭ prytułku, vy sami vinavatyja».
Fota «Radyjo Racyja»
Andreja paśla šaści sutak za kratami vypuścili. Asudzili ŭžo na nastupny dzień — dali čarhovyja 15 sutak. Mužčyna na tym pasiadžeńni nie prysutničaŭ. Pakul jon na voli. A voś žonku pieraviali ŭ SIZA.
Što dziŭna: ahlad u kvatery byŭ źviazany z artykułami 188 i 369 Kryminalnaha kodeksa — Paklop i źniavaha pradstaŭnika ŭłady. A kryminalnuju spravu na žančynu, jak stała viadoma ad advakata, zaviali pa inšym artykule — 364, Hvałt abo pahroza jaho prymianieńnia ŭ adnosinach da supracoŭnika orhanaŭ unutranych spraŭ.
«Što za epizod — pakul niezrazumieła. Mahčyma, padčas ahladu adbyłasia niejkaja pravakacyja», — miarkuje Andrej.
Orhany apieki ŭžo telefanavali, što źbirajucca pryjści z pravierkaj. Sproba pastavić siamju na ŭlik jak prablemnuju była jašče vosieńniu, ale ŭsio skončyłasia papiaredžańniem. Na pasiadžeńnie padtrymać Šarendaŭ tady pryjšło kala sta bieraściejcaŭ, mahčyma, tamu spravu zamiali.
«Heta vielmi vialiki šok dla dziaciej, asabliva dla małodšaha. Kožnuju ranicu jon pračynajecca i ŭ pieršuju čarhu biažyć da łožka, pytajecca, dzie mama.
Na ščaście, Palina paśpieła sabrać z saboj niejkija rečy. Jašče ŭ IČU my pieradali joj praduktovuju pieradaču. Asnoŭnaje pytańnie — što nie siońnia dyk zaŭtra mianie pasadziać u turmu. Rodzičy ŭ pieršuju čarhu buduć zajmacca dziećmi, budzie nie da taho, kab chadzić da Paliny. Moj baćka tolki pieranios karanavirus, u davoli ciažkim stanie zaraz doma, i maci vymušana jaho dahladać. Usia apieka dziaciej budzie kłaścisia na maci Paliny, jakoj 68 hod».
Andrej pieražyvaje, što ŭ žonki mohuć być prablemy praź jaje bajavy charaktar.
«Palina — čałaviek sa stojkaj pazicyjaj. Jana nie budzie pryznavać paradki, jakija dziejničajuć u SIZA, za heta moža patrapić u karcar. Tamu jość padstavy chvalavacca za ŭmovy, u jakich jana budzie ŭtrymlivacca».
11 studzienia Palinu Šarenda-Panasiuk naviedaŭ advakat u SIZA №7 Bresta. Stała viadoma, u čym abvinavačvajuć aktyvistku, piša tielehram-kanał «Basta».
Palina nibyta sarvała masku z «milicyjanta», čym naniesła jamu «cialesnyja paškodžańni». Heta adbyłosia 3 studzienia, kali ŭ kvateru aktyvistki ŭvarvalisia ludzi ŭ čornym, vybiŭšy pry hetym dźviery.
