Źbity nieviadomymi ŭ trenikach la ŭłasnaha doma Viktar Maroz raskazaŭ, jak ciapier siabie adčuvaje i što ŭčora adbyłosia.
Čytajcie: Nalot na Novuju Baravuju. «Nieviadomy ŭ trenikach dastaje pistalet i na vačach dziciaci bje muža nahoj u žyvot» VIDEA
Čytajcie: Źbitaha ŭ dvary Viktara Maroza pieraviali ŭ chirurhiju Balnicy chutkaj dapamohi: «Strasieńnie mozhu, vanity, niešta z šyjaj»
«U rajonie 22-j hadziny vyjšli ŭ dvor prahulacca z synam i žonkaj, u nas tam usio aharodžana. Sustreŭ tavaryša, havorym, i vo — biažyć maja susiedka, za joj niechta ŭ trenikach, pačynaje šturchać, na videa ŭsio dobra vidać.
Ja pytajusia: ty chto taki? Jon ničoha nie adkazvaje i dastaje pistalet, pobač staić jaho «kaleha». Potym cieraz płot čałaviek 10 pieraskokvajuć, pieršyja dvoje na mianie pakazvajuć: «Jon».
Mianie pačynajuć łamać, ciahnuć u mašynu. Chto heta takija, ja dahetul nie viedaju. Kala mašyny pačynajuć bić: «Dzie ty bačyŭ, kab tabie niešta pakazvali?». Havorka pra paśviedčańnie, imavierna, bo ja prasiŭ pakazać jaho, kali heta supracoŭniki milicyi. Bo ništo ž nie ŭkazvała na toje, što heta achoŭniki pravaparadku. Nu, mianie pavalili na ziamlu, bili pa hałavie, pa patylicy, pa šyi. Potym zakinuli ŭ mašynu. My jechali niadoŭha — pierasadzili ŭ bus, tam na kaleniach ja dajechaŭ da Pieršamajskaha RUUSa. U RUUSie stała kiepska, pačało vanitavać, vyklikali chutkuju hadziny praź dźvie, potym pryvieźli ŭ Balnicu chutkaj dapamohi.
Ciapier znachodžusia ŭ balnicy. U mianie strasieńnie mozhu, čerapna-mazhavaja traŭma, balić skivica, jość siniaki. Asnoŭnaja skarha — hałava balić», — skazaŭ Viktar.
