Try scenary, jakija prosta ciapier paralelna raźvivajucca ŭ Biełarusi, Pavieł Łatuška akreśliŭ u novym vypusku debataŭ «DysKUT».

Adzin scenar jon nazyvaje rasijskim, druhi — scenarom Łukašenki, treci — biełaruskim. 

«Kali my kažam pra rasijski scenar, to jon vyhladaje nastupnym čynam. Rasijski bok ciśnie na Łukašenku, kab jon źmianiŭ Kanstytucyju, źmienšyŭ paŭnamoctvy prezidenta, stvaryŭ šmatpartyjnuju sistemu ŭłady, u jakoj urad budzie abiracca ci pryznačacca parłamientam i tolki farmalna zaćviardžacca prezidentam. I heta tady daje mahčymaść farmiravać palityčnyja siły, jakija buduć zacikaŭlenyja ŭ bolš ščylnych adnosinach z Rasijskaj Fiederacyjaj», — tłumačyć Łatuška.

U scenary Łukašenki jon bačyć žadańnie ŭtrymać uładu na bližejšyja piać hadoŭ. 

«Łukašenka supraciŭlajecca padychodu Rasijskaj Fiederacyi i tym damoŭlenaściam, jakija byli dasiahnutyja padčas sustrečy z Pucinym u Sočy. Jon vyvodzić na paradak dnia admovu ad źmien u Kanstytucyju. Paźniej pryjazdžajuć vysokija pradstaŭniki Rasii, naciskajuć na jaho, jon znoŭ razmaŭlaje pra Kanstytucyju, uzdymaje pytańnie Usiebiełaruskaha narodnaha schoda, jaki moža tearetyčna atrymać praparłamiencki status. Ale dla hetaha patrebnyja źmieny ŭ Kanstytucyju. A kab ich unieści, patrebny refierendum.

Łohika ŭ Łukašenki adna — heta piać hadoŭ zastacca pry ŭładzie. Jon nie choča novych vybaraŭ, nie choča źmien u Kanstytucyju. Ale ŭsio ž taki cisk Rasii budzie mieć dla jaho važnaje značeńnie», — kaža palityk. 

Treci varyjant Łatuška nazyvaje scenarom biełaruskaha hramadstva, pry jakim Łukašenka adychodzić ad ułady i adbyvajucca novyja demakratyčnyja vybary. 

«Zrazumieła, pieradumovy — heta vyzvaleńnie ŭsich palitźniavolenych, pakarańnie tych, chto spryčyniŭsia da złačynstvaŭ suprać biełaruskaha naroda, prypynieńnie ŭsich represij i sami vybary, — miarkuje Pavieł Łatuška. — Dyk voś dva z troch scenaroŭ praduhledžvajuć adychod Łukašenki ad ułady. Tak što ŭžo 2:1 na demakratyčnym baku». 

Jon kaža, što pratesty, sankcyi, kryminalny pieraśled vinavatych u złačynstvach, źniešnie-palityčnaja izalacyja i dalejšaja samaizalacyja — usio heta razburaje isnujučuju palityčnuju sistemu i robić niepaźbiežnaj źmienu ŭłady. 

«Kali vy hulali ŭ «Dženhu», to možna skazać, što voś hetych kubikaŭ, jakija padčas hulni vymajuć ŭ kanstrukcyi i pierastaŭlajuć navierch, — ich užo zašmat vyniata. Tak i sistema razburycca, jak padčas hetaj hulni ŭ «Dženhu», — paraŭnoŭvaje Łatuška. 

Hladzieć dyskusiju całkam na jutubie

Клас
0
Панылы сорам
0
Ха-ха
0
Ого
0
Сумна
0
Абуральна
0