Milicyja pryjechała dadomu da Iłony Złatkinaj — byłoj miedsiastry Babrujskaha rajonnaha ankałahičnaha dyspansiera — 23 śniežnia, paviedamlaje «Babrujski kurjer». Kali žančyna doŭha nie adčyniała dźviery, supracoŭniki milicyi vyklikali MNS. Padčas pieratrusu ŭ Iłony kanfiskavali techniku, zatym žančynu da viečara apytvali ŭ RAUS i Śledčym kamitecie.

23 śniežnia Iłona z mužam byli doma. Kala 11 hadziny ranicy da ich u dźviery stali stukać supracoŭniki milicyi. Muž i žonka spačatku vyrašyli zrabić vyhlad, što doma nikoha niama, ale nieŭzabavie ŭbačyli, jak padjazdžaje pažarnaja mašyna. Jašče praź niejki čas pačuli, jak na leśvičnaj kletcy, pa słovach Iłony, «zavodziać bałharku». Kab paźbiehnuć uzłomu dźviarej, žančyna adčyniła.

Supracoŭniki pradjavili joj pastanovu na pieratrus, patłumačyli, što jon pravodzicca ŭ miežach kryminalnaj spravy ab paklopie na hałoŭnaha lekara Babrujskaj centralnaj balnicy. Nibyta jość padazreńnie, što mienavita Iłona raźmiaściła ŭ niejkim telehram-kanale infarmacyju ab tym, što pa zahadzie hałoŭnaha lekara ŭ Babrujsku zvalniajuć miedykaŭ.

U vyniku pieratrusu ŭ siamji Złatkinych zabrali noŭtbuk, fłeški, u Iłony taksama kanfiskavali telefon.

Paśla pieratrusu miedsiastru pavieźli ŭ adździaleńnie milicyi Leninskaha rajona h. Babrujska. Tam apytali na palihrafie, paśla čaho dastavili ŭ Śledčy kamitet. Tolki tam ad śledčaha Iłona daviedałasia, što jana prachodzić jak śviedka pa spravie ab paklopie, a nie jak padazravanaja. Paśla apytańnia žančynu adpuścili, da viečara jana była doma.

Iłona kaža, što bačyła pasty, pra jakija kazali supracoŭniki milicyi i śledčy, u telehramie, navat dzialiłasia imi ź siabrami, ale sama ich nie pisała.

Iłona Złatkina pracavała miedsiastroj u adździaleńni kampjutarnaj tamahrafii ŭ Babrujskim mižrajonnym ankałahičnym dyspansiery. 4 kastryčnika hetaha hoda jana była zatrymana na mirnym šeści. Noč žančyna praviała ŭ IČU, na nastupny dzień jaje asudzili pa art.23. 34 KaAP RB za ŭdzieł u niesankcyjanavanym masavym mierapryjemstvie na 10 bazavych vieličyń.

Paśla hetaha epizodu joj prapanavali zvolnicca. Iłona nie stała abvastrać situacyju i napisała zajavu pa pahadnieńni bakoŭ.

Paśla zvalnieńnia byłaja miedsiastra stała na ŭlik u centr zaniataści, ale, pachadziŭšy pa nakiravańniach, jakija joj vydavali, zrazumieła, što nie choča viartacca ŭ hetuju sistemu.

Padčas pošukaŭ novaj pracy ź Iłonaj adbyŭsia davoli paciešny vypadak. U Centry zaniataści joj vydali nakiravańnie na vakansiju miedsiastry adździaleńnia kampjutarnaj tamahrafii ŭ ankadyspansiery — na jaje byłoje pracoŭnaje miesca. Iłona vyrašyła schadzić. Pa słovach žančyny, u adździele kadraŭ nie viedali, što rabić, pabiehli raicca da hałoŭnaha lekara, a praź dzień dasłali joj adkaz, što vakansij niama.

Клас
0
Панылы сорам
0
Ха-ха
0
Ого
0
Сумна
0
Абуральна
0