Natalla i Dźmitry Čavuskiny

Natalla i Dźmitry Čavuskiny

30 listapada byŭ apošni pracoŭny dzień namieśnicy dyrektara pa ahulnych pytańniach filijału «Žłobinskija elektryčnyja sietki» RUP «Homielenerha» Natalli Čavuskinaj. Biaz pracy zastaŭsia i jaje muž — načalnik adździełu sacyjalnaha raźvićcia elektrasietak, piša «Radyjo Svaboda».

Aficyjnaja pryčyna zvalnieńnia — hrubaje parušeńnie pracoŭnych abaviazkaŭ.

Padstavaj stała rašeńnie kamisii pa supraćdziejańni karupcyi, jakaja «pryznała mahčymaść najaŭnaści ci patencyjnaha ŭźniknieńnia kanfliktu jak u słužbovych asob pradpryjemstva».

Sami Čavuskiny pierakananyja, što pryčyna ŭ ich aktyŭnaj hramadzianskaj pazycyi. Natalla Čavuskina była staršynioj, a Dźmitryj — siabram kamisii na ŭčastku, dzie pieramahła Śviatłana Cichanoŭskaja.

Za ŭdzieł u maršy Dźmitryj adsiedzieŭ 15, a Natalla — 10 sutak u žłobinskim IČU.

Natalla adpracavała ŭ elektrasietkach 15, a Dźmitryj — 13 hadoŭ. Dyscyplinarnych spahnańniaŭ nia mieli. Palitykaj nie cikavilisia. Da taho času, pakul u krainie nia zdaryłasia 9 žniŭnia 2020 hodu.

«Vybarcy nam kazali: «Harycie ŭ piekle!»

Na minułych vybarach Natalla ŭznačalvała ŭčastkovuju kamisiju. Dźmitryj byŭ siabram kamisii. Pavodle słovaŭ Natalli, usie siabry kamisii pahadzilisia sumlenna ličyć hałasy. «Pa-inšamu ja nie mahła. Jak by ja potym spała? Vyrašyła zrabić tak, kab nie było soramna. Kali siabry ŭčastkovaj kamisii abychodzili vybarcaŭ — razdavali zaprašeńni, to niekatoryja praklinali kamisiju i kazali: «Harycie vy ŭ piekle!» Mnohija vybarcy prasili, u tym liku i mianie, sumlenna pravieści vybary», — kaža Natalla.

Na jaje ŭčastku Cichanoŭskaja nabrała prykładna 220 hałasoŭ, Łukašenka — kala 120. Usiaho hałasavała kala 400 čałaviek.

«Da žniŭnia my byli absalutna apalityčnymi. Žyli ŭ svaim śviecie — siamja, sabaki, i nam nichto nie patrebny. Pra toje, što adbyvajecca ŭ krainie, viedali niejki minimum», — kaža Dźmitryj.

«Što vy za ideolah, što vašyja ludzi chodziać aby-kudy!»

Siamja žyvie ŭ centry Žłobina. 10 žniŭnia jany stali śviedkami, što na vulicach horadu pačałasia «prosta bojnia». Potym supracoŭniki elektrasietak, jakija trapili «pad razdaču», raskazvali heta ŭsio Natalli. «Heta było piekła. Bili ŭsich, i bili mocna. Tak ściskali ściažkami ruki, što jany čarnieli! Ja była ŭ šoku. A na pracy mnie kazali: «Što vy za ideolah, što vašyja ludzi chodziać aby-kudy», — kaža były ideolah.

Tym časam kiraŭnictva prasiła jaje pravieści ź «niadobranadziejnymi» hutarku.

«Ja im paraiła być razumnymi, kab nie traplacca znoŭ… A kamandavać ludźmi — chto ja takaja?» — kaža Natalla.

«Nas aburyŭ toj hvałt, jaki adbyŭsia ŭ našym horadzie. Byŭ schod, na jakim prysutničaŭ načalnik milicyi. Jon abiacaŭ, što za mirnyja maršy nikoha nia buduć karać. 16 žniŭnia jakraz byŭ čarhovy marš. My vyjšli taksama, bo nam było cikava pahladzieć, što robicca ŭ našym horadzie. Usio było absalutna mirna, spakojna. Ludzi išli radasnyja, sa ściahami. Milicyja nikoha nie čapała, nie papiaredžvała. Adčuvałasia, što heta takaja demanstracyja, kštałtu 9 traŭnia», — kaža Dźmitryj.

«Ludziej pazbaŭlajuć prava zastavacca ludźmi»

Sud paličyŭ, što Natalla i Dźmitryj byli «aktyŭnymi ŭdzielnikami» niesankcyjanavanaha mierapryjemstva, i pakaraŭ ich aryštam. Natalla atrymała 10, Dźmitryj — 15 sutak.

«Dokazam majho aktyŭnaha ŭdziełu sud paličyŭ biełuju sukienku, u jakoj ja była. I biełyja kvietki ŭ Dźmitryja», — kaža Natalla.

U pastanovie sudu było napisana, što tolki takoje pakarańnie, jak sutki, dapamoža «aktyŭnym udzielnikam» uśviadomić svaju vinu.

«U mianie byŭ šok ad hetaha prynižeńnia — raździavacca dahała, brudnaja kamera, nie ciače vada, dali tolki adnu praścinu i kavałak koŭdry. Vobšuki ranicaj i viečaram. Choład strašenny. Napeŭna, usie byli b zadavolenyja, kab ja płakała. Ale ja nia płakała i na ich pytańni adkazvała, što ŭ mianie ŭsio dobra. Nia viedaju, čaho jany chacieli dabicca ad nas. Ale dabilisia supraćlehłaha», — kaža Natalla.

Častku terminu jana siadzieła z žančynami, jakich sudzili pa kryminalnych artykułach. «Mianie aburała, jak da ich staviacca! Jany ž ludzi ŭ pieršuju čarhu. Ludziej karajuć tak, što pazbaŭlajuć ich prava zastavacca ludźmi. Kali tyja žančyny vysłuchali maju historyju, to mocna aburylisia, maŭlaŭ, što heta za kraina, kali takija ludzi traplajuć u turmu», — zhadała były ideolah.

U izalatary Natallu i Dźmitryja vyklikała na hutarki milicejskaje načalstva. Ich papikali za ichnuju pazycyju i raskazvali, jak milicyja «ŭratavała krainu».

«Radykalna nastrojenyja asoby, jakija nie padtrymlivajuć kanstytucyjny ład»

Paśla adbyćcia Čavuskinymi sutak načalnik Žłobinskaha RAUS Hienadź Mielnik nakiravaŭ zvarot da dyrektara Žłobinskich elektrasietak. U liście jon piša, što Čavuskiny, u abaviazak jakich uvachodzić idealahičnaja praca ŭ kalektyvie, «sami źjaŭlajucca radykalna nastrojenymi asobami, jakija nie padtrymlivajuć kanstytucyjny ład». «Unutranyja pierakanańni Čavuskinych mohuć admoŭna ŭpłyvać na idealahičny składnik vašaha pradpryjemstva, spryjać farmavańniu ŭ jaho nehatyŭnaha staŭleńnia da ŭłady i aparatu dziaržaŭnaha kiravańnia», — napisaŭ načalnik milicyi.

«Ciapier taki čas, što nielha iści na kampramis z sumleńniem»

Na pradpryjemstvie sklikali pazačarhovuju kamisiju pa supraćdziejańni karupcyi i vyrašyli, što ŭ Natalli i Dźmitryja jak, z adnaho boku, muža i žonki, a z druhoha — słužbovych asob, jość patencyjnaja mahčymaść uźniknieńnia kanfliktu intaresaŭ. Prafsajuz daŭ zhodu na zvalnieńnie. Tak Čavuskiny zastalisia biaz pracy.

«Chiba, kali mianie pryznačali na pracu, nia viedali, što my muž i žonka? Abo my heta chavali i heta było tajamnicaj? Zakonam nie zabaroniena pracavać tak mužu i žoncy. Ja liču našaje zvalnieńnie niezakonnym», — kaža Natalla.

«My vyrašyli sudzicca, bo heta niespraviadliva», — kaža Dźmitryj.

Jany ŭstupili ŭ niezaležny prafsajuz REP i z dapamohaj pravavoha inspektara Leanida Sudalenki padrychtavali pazoŭ u sud.

«My znojdziem sabie pracu. My nia zhubimsia ŭ hetym žyćci. My byvali šmat razoŭ za miažoj. Ale ciapier ja pryncypova chaču žyć u Biełarusi. Nielha ciarpieć toje, što ciapier adbyvajecca ŭ našaj krainie, hety hvałt! Ciapier taki čas, što nielha ŭstupać u kampramisy sa svaim sumleńniem», — kaža Dźmitryj.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?