Marš piensijanieraŭ 19 kastryčnika, zdavałasia, prajšoŭ biez zatrymańniaŭ. Ale presinh na niekatorych udzielnikaŭ pačaŭsia ŭ nastupnyja dni.
Piensijaniercy Irynie Charytanovič 59 hod, jana padpracoŭvaje prybiralščycaj. U aŭtorak jaje vyklikała słužba biaśpieki kampanii, pačała raspytvać pra ŭdzieł u maršy — navošta tudy chodzić, kolki joj za heta płaciać.
Marš mudraści 19 kastryčnika. Fota Nadziei Bužan
«A 20-j viečara mama skončyła pracu, ale ŭčora dadomu tak i nie viarnułasia. Kala 12-j nočy pazvaniła z Maskoŭskaha RUUS, skazała, što ŭ čaćvier budzie sud. Bolš ničoha paviedamić nie paśpieła. My pryjechali da adździaleńnia, ale akazałasia, što mamu ŭžo pieravieźli na Akreścina», — raspaviadaje jaje dačka Ina.
22 kastryčnika adbyŭsia sud. Ina paśpieła na jaho pryjechać. Irynu sudzili pa skajpie — była drennaja suviaź, i piensijanierka nie ŭsio čuła. Advakata vyklikać nie dali. Na žančynu paviesili try pratakoły — adzin za minuły marš piensijanieraŭ, dva inšyja — za niadzielnyja mitynhi ŭ vieraśni.
«Ja ź joj žyvu, ale ničoha pra hetyja pratakoły raniej nie čuła, — adznačaje dačka. — Pratakoły za vierasień składzienyja, jak pad kapirku. Tam było napisana, što dakumienty padmacavany fota i videa, ale my ich nie bačyli. Mahčyma, heta toje, što źniali na akcyjach supracoŭniki orhanaŭ. U pratakole za 19 kastryčnika paznačana, što ŭ jakaści dokazu jość zvodka navin z ANT».
Sudździa Maskoŭskaha rajona Lidzija Cielica asabliva raspytvać Irynu nie stała. Ahučyła pakarańnie ŭ 15 sutak i pabiehła dalej pa spravach.
Rodnyja piensijanierki siońnia zmahli pieradać joj rečy na Akreścina. Jany šakavanyja situacyjaj.
«Mama — aktyŭny čałaviek, usie viedali pra jaje pazicyju suprać dziejučaj ułady, na pracy narmalna da hetaha stavilisia. Što zdaryłasia potym, niezrazumieła», — ździŭlena dačka.
