Miarkujučy pa paviedamleńniach čytačoŭ «Našaj Nivy», ułady chočuć pajści va-bank i sabrać u Minsku mieha-mitynh. Vyhladaje, što da rajonaŭ daviedzieny płan pa kolkaści ŭdzielnikaŭ, a kiraŭniki na miescach vykručvajucca, kab jaho vykanać. Jechać nichto asabliva nie rviecca, tamu na niekatorych pradpryjemstvach za pajezdku navat prapanujuć hrošy.
Voś što napisali našy čytačy.
«Baćka pracuje ŭ Maładziečnie, [nazvu pradpryjemstva maje Redakcyja]. Siońnia prachodziŭ schod nakont praŭładnaha mitynhu 25 kastryčnika. «Daviedziena» kolkaść ad Maładziečanskaha rajona — 1500 čałaviek. Apłata, jak ja zrazumieŭ, za košt arhanizacyj».
«Stolinski rajon abaviazany pasłać 800 čałaviek. Raznaradka».
«U Stolinskim [nazvu pradpryjemstva maje Redakcyja] staršynia prafkama abviaściŭ, chto žadaje na vychadnyja pajechać na praŭładny mitynh u Minsk. Ale ŭsie, chto prysutničaŭ z rabočych, admovilisia.
«U Mahilovie taksama źbirajuć rabotnikaŭ sadkoŭ».
«Filijały ŭ Mahiloŭskaj vobłaści AAT«Bułačna-kandytarskaja kampanija «Damačaj» (dziaržaŭnaje pradpryjemstva, padparadkavana Mahiloŭchlebpramu), u tym liku rajonnyja pad zusim źlohku prykrytaj pahrozaj zvalnieńnia/niepradaŭžeńnia kantraktu prymušajuć jechać 25.10 u Minsk na mitynh za Łukašenku. Kirujučy skład (dyrektary, hałoŭbuch, hałoŭnyja inžyniery, načalniki padraździaleńniaŭ) abaviazany być u abaviazkovym paradku».
«Siońnia (20 kastryčnika) źbirali ŭsich dyrektaraŭ škoł i zahadčykaŭ dziciačych sadkoŭ Frunzienskaha rajona Minska. Paviedamili, što 25 kastryčnika adbudziecca mitynh u padtrymku Łukašenki. Patrabavali 100% jaŭki ŭsich supracoŭnikaŭ: nastaŭnikaŭ, dvornikaŭ, techničak i h.d. Usiaho zahadana sabrać 10 000 čałaviek ad Frunzienskaha rajona».
«Ź Viciebska 90 čałaviek ź SIZA jedzie 25.10 prymusova».
«Na vilejskim chlebazavodzie prapanoŭvajuć źjeździć na mierapryjemstva, abiacajuć zapłacić».
«U Hrodnie pa daškolnych ustanovach źbirajuć ludziej na pajezdku ŭ Minsk 25.10».
«Jość infarmacyja, što ŭ niadzielu z Bresta na Minsk jedzie 4 dadatkovyja ciahniki z 72 vahonami ŭ sumie».
«Na vychadnyja, chutčej za ŭsio 25 čysła, u prymusovym paradku honiać aficeraŭ MNS z Bresta. Paviazuć svaim aŭtobusam. Siońnia składali śpisy».
«Infarmacyja ad ideołaha, Navabielicki rajon Homiela. Sapraŭdy źbirajuć, jak adkaz ŭltymatumu Cichanoŭskaj, kvota z kalektyvu 200 čałaviek — 20 čałaviek. Pryčym ludziam prapanujuć nie kazać pra mitynh, a kazać, što ludzi pajeduć na ekskursiju i prapanujuć ŭziać z saboj ciopłyja rečy».
«Linhvahumanitarny kaledž Minsk. Skazali, usie supracoŭniki pavinny być na praŭładnym mitynhu».
«Maju mamu (sacyjalny piedahoh SPC adnaho z rajonaŭ Minska) klikali, ale jany ŭsim kalektyvam admovilisia».
«Na ZŁiNie pracuju, źbirajuć pa 3 čałavieki z cecha, niešta kala 50 z zavoda, abiacajuć dva adhuły, z Homiela nibyta poŭny ranišni ciahnik źbirajucca adpravić na mitynh 25 kastryčnika».
«U Dziaržaŭnym kamitecie sudovych ekśpiertyz paviedamili, što budzie mitynh, i sprabavali adpravić na jaho supracoŭnikaŭ. Usie admovilisia».
Tak što, mahčyma, na hetych vychadnych paŭtorycca situacyja 16 žniŭnia, kali dva baki «mierylisia mitynhami». Tady, nahadajem, łukašenkaŭcy źvieźli 15 tysiač čałaviek, a na Marš svabody vyjšła da 300 tysiač.
