Alaksandr Łukašenka 20 kastryčnika zładziŭ kadravy dzień. U krainie źjavilisia try novyja rektary VNU, pamočnik pa Mahiloŭskaj vobłaści, a taksama kiraŭnik Aparata Savieta ministraŭ. Krychu pra hetych ludziej u ahladzie «NN».
Syn padtrymlivaŭ zabastoŭščykaŭ
Natalla Karčeŭskaja i Kanstancin Michalenka. Fota z fejsbuk
Natalla Karčeŭskaja stała rektaram Biełaruskaha dziaržaŭnaha ŭniviersiteta kultury i mastactvaŭ. Apošnija dva hady da hetaha jana źjaŭlałasia pieršaj namieśnicaj ministra kultury.
Natalli 46 hadoŭ, jana rodam ź Minska. Skončyła Instytut kultury, kandydat mastactvaznaŭstva. U rodnym univiersitecie jana i pracavała doŭhi čas. Da pieravodu ŭ Ministerstva źjaŭlałasia pieršym prarektaram. Da hetaha pracavała dekanam fakulteta tradycyjnaj biełaruskaj kultury i sučasnaha mastactva. Navukovyja intaresy — historyja i teoryja chareahrafičnaha mastactva.
Karčeŭskaja źjaŭlajecca chareohrafam u mnohich śpiektaklach Kupałaŭskaha teatra. Naprykład, u «Dźviuch dušach», «Miestačkovym kabare», «Listapad. Andersien». Praŭda, ciapier niezrazumieła, kali hetyja dy i inšyja śpiektakli ŭbačać hledačy.
Karčeŭskaja ŭ šlubie z akcioram Kanstancinam Michalenkam, jon krychu maładziejšy za jaje. U pary jość syny Alaksiej i Fiodar. Alaksiej padpisany ŭ sacyjalnych sietkach pa-biełarusku. Jon vučyŭsia ŭ Akademii muzyki, hraje na alcie.
U sacyjalnych sietkach Alaksiej dapuskaŭ samyja pikantnyja žarty. Darečy, «UKantakcie» na avatarcy ŭ jaho zaraz staić zdymak z MTZ ad 19 žniŭnia. Mienavita ŭ toj dzień supracoŭniki Fiłarmonii, dzie i pracuje Alaksiej, pryjechali na zavod padtrymać zabastoŭku.
Sama Karčeŭskaja, jakaja zvyčajna vielmi aktyŭnaja ŭ sacyjalnych sietkach, u dni paśla vybaraŭ zachoŭvała absalutnaje maŭčańnie.
U «injazie» ŭpieršyniu za časami Łukašenki novy rektar
Natalla Łapcieva. Fota BiełTA
Natalla Baranava cełyja 25 hadoŭ (amal stolki ž jak Łukašenka) uznačalvała Minski dziaržaŭny linhvistyčny ŭniviersitet, jaki čaściej nazyvajuć prosta «injaz». Nichto z rektaraŭ nie moža pachvalicca takoj žyvučaściu na adnoj pasadzie.
Mienavita studenty «injaza» byli siarod tych, chto najbolš rašuča padtrymaŭ zabastoŭki navučencaŭ u vieraśni sioleta. Šmat studentaŭ VNU vychodzili na vulicy, adbyvali pakarańni na sutkach.
Nastupnicaj Baranavaj stała Natalla Łapcieva, jakaja da hetaha była dekanam fakulteta niamieckaj movy. Joj 52 hady, rodam ź vioski Asinaŭka Čavuskaha rajona Mahileŭskaj vobłaści. U 1990-m skončyła Linhvistyčny pa śpiecyjalnaści «Niamieckaja i anhlijskaja movy».
Kandydat piedahahičnych navuk, dacent. Navukovymi intaresami Łapcievaj paznačany: raspracoŭka kancepcyj dla stvareńnia dapamožnikaŭ pa navučańni zamiežnaj movy darosłych. Heta nie samy publičny čałaviek.
«Ja ŭdziačny kiraŭnictvu krainy»
Alaksandr Bachanovič. Fota z vk.com
Jašče adzin rektar źmianiŭsia — u Bresckim dziaržaŭnym techničnym univiersitecie. Sprava ŭ tym, što raniejšy rektar Alaksandr Drahan, kali ŭ jaho spytali pra zatrymanych studentaŭ, adkazaŭ: «My — adzin kalektyŭ, a nie supraćlehłyja baki». Mahčyma, takaja pazicyja mała kamu spadabałasia.
Zatoje novy rektar absalutna ideałahična vyvierany čałaviek. Alaksandr Bachanovič pracavaŭ dahetul prarektaram pa vučebnaj rabocie BNTU, taksama jon byŭ deputam Minharsavieta.
«Sapraŭdny lidar nacyi! Brava!» — tak pisaŭ Bachanovič u svaich sacyjalnych sietkach paśla vystupu Alaksandra Łukašenki na praŭładnym mitynhu 16 žniŭnia. I paśla hetaha Bachanovič nieadnarazova vykazvaŭsia ŭ padtrymku ŭładaŭ.
Bachanoviču 48 hadoŭ, rodam z Mahilova. Jon skončyŭ Mahiloŭski mašynabudaŭničy instytut, a ŭžo mahistraturu i aśpiranturu ŭ BNTU. U dziacinstvie maryŭ stać kapitanam karabla, ale nie staŭ pastupać u marachodnaje vučylišča, bo ŭ toj čas jakraz razvaliŭsia SSSR. «Ja biaskonca caniu i ŭdziačny kiraŭnictvu krainy za toje, što zmoh realizavać siabie na radzimie», — kazaŭ jon. Źjaŭlajecca siabram «Biełaj Rusi».
Studenty BrDTU vyjšli na akcyju salidarnaści z adstaŭlenym rektaram Drahanam, jaki pakul što zastajecca ŭ VNU ŭ jakaści vykładčyka.
Z Bresta ŭ Mahiloŭ
Leanid Martyniuk. Fota majak.by
Leanid Martyniuk — novy pamočnik Łukašenki pa Mahiloŭskaj vobłaści. Znoŭ spracavała taktyka apošnich hadoŭ, kali ŭ rehijony pryznačajuć nie svaich vychadcaŭ, a ludziej z zusim inšych abłaściej.
Martyniuk rodam z Bresta, jamu 46 hadoŭ. Apošnim časam jon źjaŭlaŭsia kiraŭnikom Biarozaŭskaha rajvykankama. Čynoŭnik skončyŭ technikum čyhunačnaha transpartu, a paśla — BDATU. Pačynaŭ pracavać u «Abłsielhaspenierha» ŭ Breście.
Ad 2003 hoda Martyniuk byŭ u struktury Bresckaha abłvykankama, adkazvaŭ za pytańni, źviazanyja ź sielskaj haspadarkaj. Praŭda, potym pieraaryjentavaŭsia na kamitet ekanomiki. U 2016 hodzie ŭznačaliŭ Biarozaŭski rajvykankam. Za hety čas ničym nie adznačyŭsia.
Vučylišča KDB
Kanstancin Burak. Fota z ok.ru
Urešcie Aparat Savieta ministraŭ uznačaliŭ 50-hadovy Kanstancin Burak. Heta čałaviek ź cikavaj adukacyjaj, jon skončyŭ Maskoŭskaje vyšejšaje pahraničnaje kamandnaje vučylišča KDB SSSR imia Massavieta. Sprava ŭ tym, što ŭ saviecki čas pahraničniki byli častkaj KDB. Užo ŭ Biełarusi Burak zamacavaŭ adukacyju ŭ Akademii kiravańnia.
U svoj čas byŭ namieśnikam načalnika infarmacyjnaha ŭpraŭleńnia dziaržsakratara Rady biaśpieki. Paśla hetaha Burak pradstaŭlaŭ Biełaruś u struktury ADKB, a taksama byŭ daradcam pasolstva Biełarusi ŭ Rasii. Cikava, što na apošniaj pasadzie jon kuryryvaŭ taksama adnosiny našaj krainy z Afhanistanam.
Žanaty, maje darosłuju dačku.
