RITZAU SCANPIX/NILS MEILVANG
Dacki vynachodnik-miljanier Pieter Madsen, asudžany za zabojstva žurnalistki Kim Vajl na borcie svajoj padvodnaj łodki, sprabavaŭ uciačy z turmy. Pra heta paviedamlaje Danmarks Radio. Praź niekalki sotniaŭ mietraŭ jaho spynili i pierakanali viarnucca ŭ kamieru.
Madsen adbieh na niekalki sotniaŭ mietraŭ ad turmy Chierstedviester, pahražajučy achovie samarobnaj «bombaj». Užo praź niekalki sotniaŭ mietraŭ Madsena atačyła palicyja, bo palicejski ŭčastak znachodzicca ŭ pary kvartałaŭ ad turmy.
Paśla pieramovaŭ z palicejskimi Madsen pad prycełam snajpieraŭ viarnuŭsia ŭ kamieru. Što mienavita jon abmiarkoŭvaŭ z pravaachoŭnikami, nie ŭdałosia pačuć z-za ačapleńnia, paviedamiła karespandentka DR. Pavodle infarmacyi Ekstra Bladet, da hetaha Madsena ŭžo źmiaščali ŭ kamieru ŭzmocnienaha režymu praz schilnaść da ŭciokaŭ.
Palicyja źviazałasia z žonkaj Madsena Dženi Krupien, u minułym rasijskaj aktyvistkaj, jakaja paprasiła palityčnaha prytułku ŭ Finlandyi.
Pieter Madsen u 2017 hodzie ŭziaŭ žurnalistku Kim Val na skanstrujavanuju im padvodnuju łodku: jana chacieła napisać pra jaho. Na nastupny dzień łodka zatanuła, a dziaŭčyna źnikła. Vynachodnik spačatku kazaŭ, što vysadziŭ Kim da hetaha, zatym, što jana zahinuła na łodcy ŭ vyniku niaščasnaha vypadku. Adnak u mory znajšli častki cieła Val.
Na ciele žurnalistki byli vyjaŭlenyja nažavyja ranieńni, jakija, jak ličać ekśpierty, byli naniesienyja ŭ momant śmierci abo adrazu paśla jaje.
Madsena abvinavačvali ŭ tym, što jon zahadzia spłanavaŭ svajo złačynstva, vyrašyŭšy zadušyć Val abo pierarezać joj horła. Vynachodnik pryznaŭ, što rasčlaniŭ cieła, ale śćviardžaje, što nie zabivaŭ jaje naŭmysna. U krasaviku 2018 Madsena prysudzili da pažyćciovaha źniavoleńnia.
