Ukaz prezidenta Ukrainy ab pryciahnieńni ŭ krainu biełaruskich vysokakvalifikavanych śpiecyjalistaŭ aficyjny Minsk ličyć niedružalubnym i dyskryminacyjnym. Pra heta pasłu Ukrainy zajavili ŭ biełaruskim MZS, paviedamlaje pres-słužba źniešniepalityčnaha viedamstva.
Fota Nadziei Bužan.
Jak adznačaje MZS, hety ŭkaz «nielha traktavać pa-inšamu, jak vidavočna niedružalubny i dyskryminacyjny krok ukrainskaha boku, jaki miažuje z umiašańniem va ŭnutranyja spravy Respubliki Biełaruś». Akramia taho, ličać u viedamstvie, dakumient «padryvaje davier u dvuchbakovych adnosinach» i parušaje niekatoryja składzienyja pamiž krainami pahadnieńni. U pryvatnaści, Dahavor ab družbie i dobrasusiedstvie i pahadnieńnie ab biaźvizavych pajezdkach hramadzian.
Zatym pazicyju biełaruskaha MZS prakamientavaŭ ambasadar Ukrainy ŭ Biełarusi Ihar Kizim. Jon adznačyŭ, što ŭkrainski ŭkaz byŭ pryniaty ŭ suviazi sa zvarotami biełaruskich śpiecyjalistaŭ.
«Vidavočna, što kali takaja prośba była vykazana, značyć ich niešta nie zadavalniaje ŭ siabie doma, u Biełarusi. Jany zachacieli źjechać u inšuju krainu i vidavočna, što z pryčyny mnohich abstavinaŭ, Ukraina dla ich vielmi pryvabny vybar (zrazumiełaja mova, rodnasnyja suviazi, ahulnaja adukacyja i h.d.). I Ukraina hatovaja takich ludziej pryniać. Tak u čym ža tut «nie družalubnaść». Jak mnie zdajecca, heta chutčej akt dapamohi tym ludziam, jakim ciapier nialohka ŭ Biełarusi (choć by časova)», — adznačyŭ ukrainski pasoł.
Nahadajem, u pačatku kastryčnika stała viadoma, što Uładzimir Zialenski padpisaŭ ukaz № 420/2020 «Ab niekatorych mierach pa pryciahnieńni pradprymalnikaŭ, vysokakvalifikavanych śpiecyjalistaŭ, jakija źjaŭlajucca hramadzianami Respubliki Biełaruś». Zhodna z dakumientam, pradprymalnikam i śpiecyjalistam u śfiery infarmacyjnych technałohij i inavacyj pradoŭžany termin časovaha znachodžańnia da 180 dzion u hodzie. Taksama dla ich uvodzicca piłotny prajekt sproščanaha afarmleńnia dazvołu na žycharstva z mahčymaściu atrymańnia dakumientaŭ u trochdzionny termin biez vyjezdu z Ukrainy i inšyja prefierencyi.
