Polski niezaležny prafsajuz «Salidarnaść» 26 žniŭnia adpravić u Biełaruś humanitarnuju dapamohu ŭ vyhladzie niekalkich dziasiatkaŭ ton charčovych praduktaŭ, «što moža spatrebicca na pracoŭnych miescach padčas zabastoŭki», paviedamiŭ staršynia prafsajuzu Piotar Duda, piša Radyjo Svaboda sa spasyłkaj na vydańnie Wiadomości.

Taksama ŭ Polščy stvaryli fond «Salidarnaść ź Biełaruśsiu», u jaki prafsajuz «Salidarnaść» unios 1 miljon złotych (bolš za 700 tysiač rubloŭ).

25 žniŭnia staršynia prafsajuzu Piotar Duda vystupiŭ sa «Zvarotam da Biełarusi» i sklikaŭ kanferencyju pa dziejnaści prafsajuzu ŭ padtrymku biełarusaŭ u baraćbie za svabodu i hramadzianskija pravy.

«My nazirajem za raźvićciom padziej u Biełarusi paśla falsyfikacyi vynikaŭ prezydenckich vybaraŭ ź vialikaj zakłapočanaściu i niepakojem. Alaksandar Łukašenka abraŭ šlach žorstkaha supraćstajańnia i žorstkaha ŭcichamirvańnia biełarusaŭ, jakija demanstravali svaju apazycyju. Ułada ŭdzielničaje ŭ barbarskim hvałcie i žorstkich źvierstvach, jakija nia majuć nijakaha racyjanalnaha apraŭdańnia, akramia adčajnaj abarony dyktatury», — napisaŭ Piotar Duda ŭ zvarocie.

Jon padkreśliŭ, što dla «Salidarnaści» heta asablivy momant, tamu što 40 hadoŭ tamu dapamoha była patrebnaja palakam, a ciapier padtrymka patrebnaja biełarusam. Jon dadaŭ, što ŭ Biełarusi «mienavita prafsajuznych aktyvistaŭ, rabočych zvalniajuć i adpraŭlajuć u turmy, tamu što jany znachodziacca ŭ avanhardzie zabastovak suprać falsyfikavanych vybaraŭ».

«Prafsajuz «Salidarnaść» abaviazany padtrymlivać adziny ŭ Biełarusi svabodny prafsajuz, a mienavita Biełaruski kanhres svabodnych demakratyčnych prafsajuzaŭ ź jahonym staršyniom Alaksandram Jarašukom. My supracoŭničajem ź im šmat hadoŭ. Inšyja prafsajuzy ŭ Biełarusi źviazanyja z režymam», — skazaŭ Duda.

Duda taksama zaklikaŭ inšyja polskija prafsajuzy i ŭsie palityčnyja partyi dałučycca da «Salidarnaści» i dapamahčy Biełarusi, «padtrymać biełaruskija siemji, jakija straciać karmilca z pryčyny aryštu abo zvalnieńnia».

Клас
0
Панылы сорам
0
Ха-ха
0
Ого
0
Сумна
0
Абуральна
0