Staršynia CVK Lidzija Jarmošyna, spasłaŭšysia na składanuju epidemijałahičnuju abstanoŭku, źmienšyła kolkaść naziralnikaŭ. U asnoŭny dzień hałasavańnia — da piaci čałaviek na ŭčastak, padčas daterminovaha hałasavańnia — da troch. Heta značyć, što jak minimum tracina tych, chto ŭžo zarehistravaŭsia, nie trapić na ŭčastki.
Fota Nadziei Bužan
Čytajcie: Jarmošyna nie puścić na ŭčastki minimum tracinu ŭžo zarehistravanych naziralnikaŭ
Pradstaŭniki inicyjatyvy «Sumlennyja ludzi», jakaja zaklikała ludziej aktyŭna zapisvacca ŭ naziralniki, zapeŭnivajuć, što taki chod CVK nie staŭ niečakanaściu.
«My dumali, što jany mohuć tak zrabić, ale spadziavalisia na inšaje, — kaža pradstaŭnik inicyjatyvy Alaksandr Chomič. — Da siońniašniaj ranicy ŭ CVK nie było farmalnych pryčyn admović naziralnikam.
Usio robicca dla taho, kab vybary prajšli jak maha bolš nieprazrysta. Nie budzie mižnarodnych i niezaležnych naziralnikaŭ, tolki praduziatyja».
Zaraz «Sumlennyja ludzi» ŭnosiać nievialikija papraŭki ŭ svaju stratehiju. U najbližejšy čas jany ahučać padrabiazny płan dziejańniaŭ.
«My ŭsio adno źbirajemsia pakryć naziralnikami ŭsie ŭčastki. Mahčyma, buduć mienš dakładnyja dadzienyja. My budziem zastavacca ŭ pravavym poli. Jość mahčymaść nazirać i bieź fizičnaha dostupu da ŭčastka».
Praz «Sumlennych ludziej» zajaŭki ŭ naziralniki pakinuli ŭžo bolš za 10 tysiač čałaviek. Paśla siońniašniaj zajavy Jarmošynaj — napłyŭ achvotnych.
U inicyjatyvie kažuć, što ŭ ich hatovy miechanizmy i mabilnyja dadatki, z dapamohaj jakich buduć adsočvać jaŭku i chod hałasavańnia. Ciapier teścirujuć płatformu dla anłajn-hałasavańnia.
«Naziralnikam pa sutnaści stanie kožny», — tłumačać.
«Sumlennyja ludzi» viaduć taksama pieramovy, kab ustalavać na ŭčastkach kamiery videanazirańnia, ź jakich budzie vieścisia anłajn-tranślacyja. Hrošy i padradčyki jość — pytańnie tolki, ci dazvolić CVK.
