Ultrafijalet zhubna ŭpłyvaje na karanavirus, zabivajučy jaho na pavierchniach za karotki čas, ale nie abaraniaje ad pramoj jaho pieradačy padčas kantaktu ludziej, paviedamiła ria.ru viadučy navukovy supracoŭnik łabaratoryi ekśpierymientalnaj virusałohii rasijskaha NDI epidemijałohii i mikrabijałohii imia Somava Halina Kampaniec.
Raniej viadomy imunołah, prafiesar Miłanskaha dziaržaŭnaha ŭniviersiteta Marya Kleryčy (Mario Clerici) paviedamiŭ «RIA Naviny», što ultrafijaletavaje vypramieńvańnie soniečnaha śpiektru chutka i efiektyŭna źniščaje karanavirus, i tamu moža aktyŭna vykarystoŭvacca ŭ baraćbie z COVID-19.
«U virusałohii viadoma daŭno, što ultrafijalet zhubna ŭpłyvaje na virusy, u tym liku abałonkavyja — takija, jakim źjaŭlajecca karanavirus. Jon dziejničaje na kletkavuju ścienku, abałonku virusa. Viadoma, što na śviatle, jakoje ŭtrymlivaje ultrafijalet, virusy hinuć dosyć chutka. Pry ŭździejańni ultrafijaletu jany taksama hinuć chutka. Heta vykarystoŭvajecca jak sposab dezynfiekcyi ŭ łabaratoryjach, u tym liku tych, dzie pracujuć z asabliva niebiaśpiečnymi virusami, taksama ŭ miedustanovach i dla apracoŭki pavierchniaŭ u boksach bijałahičnaj biaśpieki», — skazała surazmoŭca.
«Heta moža dapamahčy ŭ lačeńni tym, što virusnaja nahruzka ŭ pamiaškańni budzie źnižana, i nie budzie adbyvacca zaražeńnie inšych ludziej», — udakładniła Kampaniec.
Jana adznačyła, što z faktu ŭpłyvu ultrafijaletu na virusy nie vynikaje, što čałaviek budzie mienš schilny da zachvorvańnia, kali jon šmat času pravodzić pad soncam.
«Tut šmat aśpiektaŭ upłyvu ultrafijaletu. Jon u tym liku inicyjuje vypracoŭku vitamina D, dazvalaje paźbiehnuć jaho deficytu. Luby deficyt u arhaniźmie — heta pamianšeńnie žyćciazdolnaści, paharšeńnie imunitetu, tamu ŭ pryncypie soniečnaje śviatło — heta dobra. U haračy čas virus u navakolnym asiarodździ, jaki trapiŭ ad chvoraha na pavierchniu čahości, hinie vielmi chutka — na praciahu hadziny dakładna. Ale kali heta pramy kantakt, naprykład pry razmovie, kali asoba nie abaroniena maskaj, padčas kašlu abo čchańnia, usio adno zaražeńnie moža adbyvacca», — adznačyła Kampaniec.
«U ciopły čas hoda vykarystoŭvać ultrafijalet jak stymulatar imunnaj sistemy sensu niama. U chałodny čas — tak: heta salaryi i inšyja sposaby pavyšeńnia ŭtrymańnia vitamina D u arhaniźmie», — dadała jana.
