Alaksiej Šuhajeŭ śćviardžaje, što jaho abvinavacili ŭ arhanizacyi niesankcyjanavanaha masavaha mierapryjemstva, piša Intex-Press.
Alaksiej Šuhajeŭ ličyć, što jaho zatrymali niezakonna. Fota: Andrej Bałko
Alaksiej Šuhajeŭ arhanizavaŭ u 2014 hodzie ŭ Baranavičach supolnaść «Vieła Ruch» i z tych časoŭ pieryjadyčna źbiraje žadajučych na viełaprahułki.
— Uviečary 17 lipienia pavinna była adbycca čarhovaja «pakatuška», — raspavioŭ Intex-press mužčyna. — Adnak u hety dzień, u abied, mnie patelefanavali z Baranavickaha HAUS i zaprasili dla dačy pakazańniaŭ: nibyta chtości pakinuŭ u maim aŭtamabili-taksi telefon.
Užo ŭ adździaleńni, pa słovach viełasipiedysta, jamu skazali, što ŭ milicyi jość infarmacyja pra toje, što jon raźmiaściŭ u sacyjalnych sietkach abjavu ab niesankcyjanavanym masavym mierapryjemstvie.
— Ja rastłumačyŭ, što źbiraju ludziej — prychilnikaŭ zdarovaha ładu žyćcia — dla viełaprahułki, jak rabiŭ heta zaŭsiody. Ale supracoŭniki milicyi adkazali, što majo mierapryjemstva nie sankcyjanavana i dla jaho praviadzieńnia treba ŭzhadnieńnie z harvykankamam. Choć da hetaha dazvoł nikoli nie patrabavaŭsia. Šeść hadoŭ my katalisia, i ŭ hetym nie było parušeńnia zakona, — kaža Alaksiej Šuhajeŭ.
Pavodle jaho słoŭ, jaho źmiaścili ŭ izalatar časovaha ŭtrymańnia, dzie jon prabyŭ troje sutak, a ŭ paniadziełak, 20 lipienia, advieźli ŭ sud.
Razhledzieŭšy spravu, sudździa adpraviła dakumienty ŭ HAUS «dla likvidacyi niedachopaŭ». Samaha Šuhajeva adpuścili. Viełasipiedyst maje namier abskardzić svajo zatrymańnie.
