Na čempijona Hruzii pa bodzibiłdynhu Šota Łabžanidze skłali jašče dva administracyjnyja pratakoły za abrazu aktyvistaŭ BRSM. Hetym razam — biez zatrymańnia, kajdankaŭ i dastaŭleńnia va ŭpraŭleńnie pa baraćbie z arhanizavanaj złačynnaściu i karupcyjaj MUS. Pa słovach Šoty Łabžanidze, pratakoły jon jašče nie padpisaŭ: na minułym tydni razam ź siamjoj jon źjechaŭ ź Biełarusi, paviedamlaje Tut.by.
16 lipienia, raspaviadaje Šota Łabžanidzie, jamu patelefanavaŭ, a zatym u miesiendžar napisaŭ čałaviek, jaki nazvaŭsia supracoŭnikam RUUS. Toj paviedamiŭ, što «ŭsiaho [było] čaćviora paciarpiełych, zastałosia dva».
Jon nahadaŭ, što pra heta Šotu Łabžanidze papiaredžvali, a taksama paprasiŭ «nie paharšać stanovišča».
Ciapier na Šotu składzienyja jašče dva pratakoły za abrazu pa artykule 9.3 Kodeksa administracyjnych pravaparušeńniaŭ. Jana praduhledžvaje štraf da 20 bazavych vieličyń.
Z pratakołami jon jašče nie aznajomiŭsia i nie padpisaŭ, pakolki na minułym tydni razam ź siamjoj časova źjechaŭ za miažu.
— Chutčej za ŭsio, pavinny dasłać pa pošcie, — kaža Šota Łabžanidze.
Nahadajem, 19 červienia Šotu Łabžanidze zatrymali kala minskaha cyrka padčas «Łancuha salidarnaści», choć u pratakole ab administracyjnym parušeńni paznačyli, nibyta heta adbyłosia na Hrušaŭcy, dzie jon udzielničaŭ u niesankcyjanavanym masavym mierapryjemstvie. U vyniku Šota Łabžanidze sustreŭ svajo 30-hodździe ŭ Centry izalacyi pravaparušalnikaŭ, paśla čaho jašče byŭ sud pa administracyjnaj spravie i štraf u 20 bazavych vieličyń (540 rubloŭ).
10 lipienia Łabžanidze znoŭ zacikavilisia pravaachoŭniki. Prosta padčas treniroŭki ŭ fitnes-kłubie da jaho pryjechali supracoŭniki HUBAZiK MUS, nadzieli na jaho kajdanki i dastavili va ŭpraŭleńnie. Tam jon prabyŭ niekalki hadzin, paśla čaho byŭ sud i čarhovy štraf — 20 bazavych.
Pryčynaj takich dziejańniaŭ pasłužyła administracyjnaje pravaparušeńnie, jakoje Šota Łabžanidze ździejśniŭ 6 červienia: u asabistyja paviedamleńni aktyvistam BRSM jon napisaŭ słova, jakoje było rasceniena jak abraza.
13 lipienia ab pravaparušeńni Šota Łabžanidze vykazaŭsia pieršy namieśnik ministra ŭnutranych spraŭ Hienadź Kazakievič.
- Davajcie sydziem ad pravavoj acenki hetaj situacyi i acenim jaje z punktu hledžańnia marali i maralnaści, — prapanavaŭ padčas anłajn-tranślacyi Hienadź Kazakievič. — Chiba dastojna hruzinskaha mužčyny pisać takoje žančynie, nakolki ja pamiataju, siabru BRSM? Ź inšaha boku, na toje jano i pravavaja dziaržava, kab pa zakonie kožny hramadzianin mieŭ nie tolki pravy, ale i adkaznaść za ŭsio, što jon ździajśniaje. U tym liku i za tyja abrazy, jakija byli adrasavanyja zusim nievinavatamu čałavieku.
