Ukrainiec, jaki zachapiŭ aŭtobus z 20 zakładnikami ŭ horadzie Łuck, akazaŭsia vychadcam z Rasii. Pra heta paviedamiŭ na svajoj staroncy ŭ fejsbuku namieśnik ministra ŭnutranych spraŭ Ukrainy Anton Hieraščanka.
Maksim Kryvaš (sam jon nazvaŭsia Maksimam Płachim) naradziŭsia ŭ 1975 hodzie ŭ pasiołku Haj Arenburhskaj vobłaści. Jon byŭ dvojčy sudzimy i ŭ sukupnaści pravioŭ u miescach pazbaŭleńnia voli kala 10 hadoŭ, dadaŭ Hieraščanka. Ciapier jon žyvie ŭ Rovienskaj vobłaści.
Kryvaš utrymlivaje zakładnikaŭ užo šeść hadzin, na miescy pieryjadyčna čujucca streły. Na kantakt z pravaachoŭnikami jon nie idzie. Pavodle jaho słoŭ, jon zaminiravaŭ pasažyrski aŭtobus i nibyta zakłaŭ bombu ŭ «jašče adnym miescy».
Jon maje niekalki sudzimaściaŭ, u tym liku za razboj, machlarstva, vymahalnictva i niezakonnaje zachoŭvańnie zbroi. Akramia taho, viadoma, što raniej jon znachodziŭsia na psichijatryčnym lačeńni i navat paśpieŭ napisać knihu «Fiłasofija złačynca».
Teraryst patrabuje ad kiraŭnikoŭ sudoŭ, ministerstvaŭ, prakuratury, parłamienta, cerkvaŭ zapisać i vykłaści ŭ YouTube zajavy pra toje, što mienavita jany — terarysty ŭ zakonie. Viadoma, što jon vykarystoŭvaje telefony zakładnikaŭ dla raspaŭsiudžvańnia svaich patrabavańniaŭ.
Siarod zakładnikaŭ — žančyny, 15-hadovaje dzicia, a taksama ciažarnaja. Sam teraryst śćviardžaje, što ŭ aŭtobusie šmat ludziej.
Centr Łucka pierakryty i abiastočany.
