Śviatłana Cichanoŭskaja naradziłasia ŭ Mikaševičach. Što pra jaje havorać na radzimie? Adkazvaje Miedyja-Paleśsie.
Śviatłana naradziłasia ŭ Mikaševičach u 1982 hodzie, 11 vieraśnia. Baćki nie zachacieli fihuravać u publikacyi. Ad susiedziaŭ možna daviedacca, što baćka siamji Hieorhij — kiroŭca, a maci Valancina — kuchar. Ludzi prostyja i prystojnyja.
Vučyłasia ŭ Mikaševickaj SŠ №2. Jak raspaviała jaje kłasny kiraŭnik Maryja Važan, Śviatłana była nie prosta vielmi adkaznaj, ale i mahła adstajać svajo mierkavańnie, jakoje hruntavałasia na hłybokich viedach. Jana atrymała załaty miedal u liku bolš za dziasiatak svaich adnakłaśnikaŭ i adnakłaśnic. Na dumku Maryi Važan, heta byŭ bliskučy vypusk. Padumać tolki —amal paŭkłasa miedalistaŭ.
— Śviatłana była vielmi ścipłaj dziaŭčynkaj, - kaža surazmoŭca. — Ja b navat skazała — niezaŭvažnaj, ale vielmi ruplivaj vučanicaj i z charaktaram. Zaŭsiody mahła adstajać svoj punkt hledžańnia. Moža, tamu vyrašyłasia na takuju ryzyku. Viadoma, kiravać krainaj — ciažki hruz, nie žanočaja heta sprava, tamu kali ŭ jaje atrymajecca, budu vielmi pieražyvać — jak ža takoje vytrymać, tym bolš maci dvaich małaletnich dziaciej.
— Śviatłana rasła razam z maimi dziećmi — kaža susiedka i kaleha maci kandydata ŭ prezidenty Taćciana Samusievič, byłaja zahadčyca stałovaj u tady jašče haradskim pasiołku.
— Jana była ścipłaj, ale, jak havorycca, intelekt nie schavaješ. Zaŭsiody adčuvałasia jaje ŭnutranaja pieravaha nad adnahodkami, choć jana jaje nijak nie vyjaŭlała, nie demanstravała, nie vypinała. Dziaŭčynka jak dziaŭčynka. Prosta vielmi vychavanaja, akuratnaja, sabranaja, i jaje čaściej možna było ŭbačyć z knihaj, čym z cackami.
Adnakłaśnica Iryna Asipčuk adznačyła, što Śviatłana vielmi pryjaznaja, choć jašče ŭ školnyja hady była jak by sama ŭ sabie, bo ŭsiu siabie addavała vučobie, ale nie tamu, što chacieła čahości damahčysia, prosta vielmi adkaznaj była i, jak pakazvajuć apošnija padziei, takoj i zastajecca.
— I kolki b ni kazali, što kiravać krainaj — nie žanočaja sprava, ja dobra viedaju, što ŭ jaje vielmi valavy charaktar, praktyčnaść u spałučeńni z dušeŭnaściu. A jašče cudoŭnaja pamiać i ŭmieńnie zaryjentavacca ŭ luboj situacyi.
Adzinaje — jana ŭ škole nie była hramadska aktyŭnaja. Ličyła siabie zvyčajnaj dziaŭčynaj, choć adčuvałasia, što niezvyčajnaja. A čamu, my nie mahli tady razumieć. Prosta siabravali.
Paśla zakančeńnia škoły 20 hadoŭ tamu Śviatłana pastupiła ŭ Mazyrski piedinstytut imia Ivana Šamiakina. Fakultet zamiežnych movaŭ — niamieckaja i anhlijskaja. I paśpiachova skončyła VNU.
Dom, dzie vyrasła Śviatłana
Tam ža paznajomiłasia z budučym mužam Siarhiejem Cichanoŭskim.
16 hadoŭ tamu jany pažanilisia i nieŭzabavie pierajechali ŭ Homiel na jahonuju radzimu, a krychu paźniej — u Minsk. Pracavała pierakładčycaj, sakratarkaj, pa abaviazku słužby niekatory čas znachodziłasia ŭ Irłandyi. A muž tym časam zarablaŭ hrošy na ŭtrymańnie siamji ŭ Rasijskaj Fiederacyi.
Sa słoŭ tych, chto jaje dobra viedaje, Śviatłana Hieorhijeŭna palitykaj nie cikaviłasia nikoli.
Susiedzi skazali, što Siarhiej Cichanoŭski, kali pryjazdžaŭ z žonkaj i dziećmi da baćkoŭ Śviatłany, što vielmi redka ŭ ich atrymlivałasia, zaŭsiody vyhladaŭ pradstaŭniča, byŭ vielmi vietły. Jany byli b rady ŭbačyć jaho jašče i jašče raz kala padjezda doma pa vulicy Maładziožnaj.
— Kali Śviatłana jašče tut žyła, heta była vulica Pieršamajskaja, d. 95, - uśmichajecca susiedka Taćciana Samusievič. — Mnohaje źmianiłasia z tych časoŭ.
