Fota z sajta advokaty.by

Fota z sajta advokaty.by

Advakat Viktara Babaryki Dźmitryj Łajeŭski publična ŭ svaim fejsbuku źviarnuŭsia da ludziej.

«Roŭna dva tydni tamu ja žyŭ zvyčajnym žyćciom jurysta, jakomu ŭsio niama kali — ranicaj sychodziš z doma, pozna prychodziš, uvieś čas pravodziš u dakumientach, z klijentami, u sudach, na śledstvie, razmaŭlaješ u asnoŭnym na jurydyčnyja temy — z ulikam majoj śpiecyjalizacyi hetyja temy nie nadta viasiołyja, amal nie bačyšsia ź siabrami, jany ciabie zabyvajuć, i dumaješ, što vakoł usim usio roŭna. I ŭ pryncypie sumniavaješsia, što dzieści mohuć być nieabyjakavyja i enierhičnyja, viasiołyja ludzi.

18 červienia 2020 hoda ja adčuŭ i praciahvaju adčuvać kulturny šok — vy ŭsie vydatnyja, vas tak šmat, vy takija svaje. I ja ŭpieršyniu pišu takoje pasłańnie, bo ja raptam zrazumieŭ, što heta značyć, kali za nami stolki vydatnych ludziej.

Aryšt Viktara Dźmitryjeviča, zrobleny nasupierak pravu, adkryŭ novuju staronku jadnańnia biełarusaŭ i ŭśviedamleńnia imi siabie jak nacyi.

Vy mianie prabačcie za patetyku, ale heta sapraŭdy tak. Heta vielmi biełaruski čałaviek (a ja takija rečy adčuvaju), i prosta tak skłalisia abstaviny, što jon źjaviŭsia ŭ toj čas, kali, mabyć, aformiłasia ŭ im patreba.

Jamu ciapier nialohka, ale jon vytrymaje i vystaić. Nie spyniajciesia i praciahvajcie pisać jamu listy, nie zabyvajučy pra inšych ludziej u SIZA, jakija taksama paciarpieli.

Vybačajcie mianie, što nie mahu ŭsim adkazać — ja atrymlivaju sotni paviedamleńniaŭ i jany ŭsie vydatnyja i vartyja adkazu, ale heta fizična niemahčyma, choć ja ŭsio čytaju. Vašy pažadańni nie tolki nadajuć sił, ale i abaviazvajuć:)

Ja prašu prabačeńnia ŭ žurnalistaŭ, na čyje zvanki i paviedamleńni ja nie paśpiavaju adkazvać. Starajusia adkazvać, ale šmat momantaŭ, kali ja biez telefona abo płanšeta, abo kali mnie treba terminova rychtavać dakumient, abo kali narada z kalehami, abo sudy i śledstva. Za hetyja dni ja prasiaknuŭsia vialikaj pavahaj da ŚMI, bo biez vas nas by nie pačali puskać kantaktavać z klijentami ŭ SIZA i naohuł mnohija pytańni, napeŭna, nie vyrašylisia b. Kaliści ja čytaŭ daśledavańni pra sacyjalny kanfarmizm, i tam kazałasia, što zło chutčej źjaŭlajecca ŭ stanie nieviadomaści dla hramadstva, a vy robicie ŭsio viadomym, tamu zmahajeciesia sa złom, i ja vam, jak abaronca, vielmi ŭdziačny.

Dva tydni tamu moj błoh čytała paru dziasiatkaŭ čałaviek, dy i ŭ pryncypie ja jaho nie razhladaŭ jak niejki kanał suviazi sa śvietam. Ale dobra, što vy ŭsie ciapier tut, tamu ja budu dzialicca navinami.

Darečy, post ab sychodzie ludziej ź biuro — heta post nie pra tych, chto syšoŭ, a pra tych, chto zastaŭsia. Nijakaha cisku ni na kaho nie było, dy i za što, i kožny maje prava sam vyznačać svoj šlach, tamu hetaja tema začynienaja. Ale na heta adhuknulisia sotni, kali nie tysiačy, biełarusaŭ z roznymi prapanovami dapamohi, i ja vam tak udziačny, što navat nie viedaju, jak heta vykazać. I jašče raz dziakuj maim rabiatam, vy najlepšyja!

Ja nie byŭ raniej miedyjnym čałaviekam i nie nadta ŭjaŭlaŭ, jak pracujuć sacsietki, ale mnie patłumačyli, što źjaŭleńnie chiejtaraŭ — heta byccam by dobry pakazčyk, tak što byccam usio pravilna:)

Šmat jość kamu skazać dziakuj, ja zahadzia prašu prabačeńnia ŭ tych, pra kaho nie skazaŭ. Dabro ja nie zabyvaju.

Dziakuj Siarhieju Zikrackamu — za pietycyju pra parušeńnie advakackich pravoŭ. Dziakuj Alehu Ahiejevu — za vielmi dobry list 22 červienia 2020 hoda i mocnyja słovy ab prafiesii.

Dziakuj advakatam, jakija nie pabajalisia ŭziacca za spravy siamji Babaryki i jaho prychilnikaŭ.

Dziakuj advakatam, jakija dapamahajuć usim hramadzianam, paciarpiełym ad vykazvańnia salidarnaści, i prostym minakam, schoplenym na vulicach. Dziakuj za vašu śmiełaść i niepachisnaść.

Kali ja skančaŭ Nacyjanalny dziaržaŭny humanitarny licej imia Jakuba Kołasa, ja dobra zapomniŭ słovy zavuča — Lavona Barščeŭskaha, jaki skazaŭ, što čynoŭniki mianiajucca, a sa svaim sumleńniem nam žyć usio žyćcio.

Meta majoj pracy — svaboda Viktara Babaryki i paćvierdžańnie jaho nievinavataści. Heta moža być nie chutka i heta dakładna nie budzie prosta.

Ale my z vam projdziem hety šlach da kanca. Ličycie heta abiacańniem».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?