U abłasnym centry milicyjanieram patelefanavaŭ 73-hadovy piensijanier, jaki paviedamiŭ, što dźviery jaho chaty ŭzłamanyja, a ŭnutry pakinuty biesparadak. Na miescy zdareńnia vyśvietliłasia, što złodziei vynieśli załatyja i srebranyja juvielirnyja vyraby, miedali, palaŭničuju strelbu z patronami, śpirtnoje i pradukty charčavańnia. Ahulnuju škodu haspadar acaniŭ u 5000 rubloŭ, paviedamlaje «Źviazda».
Nieŭzabavie apieratyŭniki kryminalnaha vyšuku vyjšli na 35-hadovaha žychara Navahrudka, jaki apynuŭsia prajezdam u abłasnym centry. Mužčyna nakiroŭvaŭsia z Žabinki, dzie pachavaŭ svajaka, dadomu. U Breście jon vyrašyŭ na niekalki dzion zastacca ŭ kvatery baćki, dzie ŭ nastupnym zładziŭ zaciažnoje zastolle.
U stanie ałkaholnaha apjanieńnia mužčyna pryjšoŭ da doma paciarpiełaha nibyta pahavaryć pra hrašovyja abaviazki jaho dački. Haspadar z žonkaj u hety čas znachodzilisia na leciščy. Nie zastaŭšy ich na miescy, padazravany ŭzłamaŭ dźviery i vynies majomaść. U vyniku atrymałasia jaho zatrymać na šlachu da aŭtavakzała. Častku vykradzienaha žychar Hrodzienščyny źbiraŭsia zabrać z saboj, astatniaje pakinuŭ u kvatery baćki.
Dziejańniam padazravanaha śledčyja dali pravavuju acenku i zaviali kryminalnyja spravy za kradziež i kradziež ahniastrelnaj zbroi. Ciapier jon praviarajecca na dačynieńnie da ździajśnieńnia inšych złačynstvaŭ. Raniej fihurant nieadnarazova pryciahvaŭsia da kryminalnaj adkaznaści za majomasnyja złačynstvy.
