Biełaruś i Rasija zaklučyli mižuradavaje pahadnieńnie ab uzajemnym pryznańni viz i pa inšych pytańniach, źviazanych z ujezdam zamiežnych hramadzian i asob biez hramadzianstva na terytoryi dziaržaŭ — udzielnic Dahavora ab stvareńni Sajuznaj dziaržavy, pieradaje BIEŁTA.
Podpisy pad dakumientam paśla pierahavoraŭ u Minsku pastavili ministry zamiežnych spraŭ Uładzimir Makiej i Siarhiej Łaŭroŭ.
Pahadnieńnie praduhledžvaje prava zamiežnych hramadzian ujazdžać, vyjazdžać, znachodzicca, jechać tranzitam pa terytoryi dźviuch dziaržaŭ na padstavie vizy adnoj ź ich i dakumientaŭ, što zaśviedčvajuć asobu. Zamiežnyja hramadzianie zmohuć pieramiaščacca pavietranym, čyhunačnym transpartam, a taksama pa šaści aŭtamabilnych darohach, jakija vyznačany ŭ dadatku da pahadnieńnia.
«Dumaju, što heta budzie vielmi dobra ŭspryniata i na spravie budzie pradaŭžać naša sumiesnaje budaŭnictva Sajuznaj dziaržavy», — padkreśliŭ siońnia Siarhiej Łaŭroŭ na sustrečy z Alaksandram Łukašenkam.
