Spadziavańni ŭład Šviecyi na toje, što nasielnictva zmoža masava vypracavać imunitet suprać karanavirusa, nie apraŭdalisia, paviedamlaje Reuters.
Novaje daśledavańnie pakazała, što antyciełaŭ vypracoŭvajecca mienš, čym čakałasia.
Šviecyja abrała bolš libieralnuju stratehiju padčas pandemii, zachoŭvajučy bolšaść škoł, restaranaŭ, baraŭ i pradpryjemstvaŭ adkrytymi, tady jak bolšaja častka Jeŭropy chavałasia za začynienymi dźviaryma. Šviedski dośvied pryhadvaŭsia i biełaruskimi aficyjnymi ŚMI dla padmacavańnia stratehii admovy ad karancinu, abranaj biełaruskaj uładaj.
Choć čynoŭniki ahienctva achovy zdaroŭja Šviecyi padkreślivajuć, što tak zvany kalektyŭny imunitet nie źjaŭlajecca samametaj, jano taksama zajaviła, što stratehija zaklučajecca tolki ŭ tym, kab zapavolić pašyreńnie virusa nastolki, kab miedycynskija słužby spravilisia ź im, a nie zdušyć jaho całkam.
Tym nie mienš, daśledavańnie pakazała, što tolki kala 6,1% šviedaŭ vypracavali antycieły — heta značna nižej za ŭzrovień, jaki ličycca dastatkovym dla dasiahnieńnia navat častkovaha kalektyŭnaha imunitetu.
Kalektyŭny imunitet, kali dastatkovaja kolkaść ludziej u papulacyi vypracavała adpornaść da infiekcyi, kab być u stanie efiektyŭna spynić jaje pašyreńnie, nie vyvučaŭsia na novym koronavirusie, i stupień i praciahłaść imunitetu siarod tych, što adužali chvarobu, taksama niavyznačanyja.
U Šviecyi ŭ sieradu było bolš za 5 000 śmierciaŭ ad karanavirusa, što ŭ šmat razoŭ vyšej na dušu nasielnictva, čym u jaje paŭnočnych susiedziaŭ, ale taksama nižej, čym u niekatorych krainach, jakija vybrali strohi karancin, jak Vialikabrytanija, Ispanija i Italija.
