Pa stanie na 19.00 18 červienia advakataŭ tak i nie dapuścili da zatrymanych ranicaj Viktara i Eduarda Babarykaŭ. Jurysty padali skarhu na supraćpraŭnyja dziejańni ŭ prakuraturu. Ni advakaty, ni štab na hety momant nie majuć infarmacyi pra miescaznachodžańnie Viktara i Eduarda. U damach siamji Babarykaŭ iduć pieratrusy, paviedamlaje štab palityka.
Kamanda sabrała rekordnuju kolkaść podpisaŭ za alternatyŭnaha vyłučenca — 426 000. Siońnia kamanda płanavała padać astatniuju častku ŭ vybarčyja kamisii.
«Nam pieraškodzili heta zrabić, bo padać podpisy ŭ niekatoryja kamisii mieli prava tolki Viktar Babaryka i Eduard Babaryka jak kiraŭnik štaba. Ale hałoŭnaje, što my ŭžo padali nieabchodnuju dla rehistracyi kandydatam u prezidenty kolkaść podpisaŭ. Štab praciahvaje pracavać u zvyčajnym režymie», — havorycca ŭ paviedamleńni.
«Padziei apošnich dzion i, u pryvatnaści, siońniašniaje zatrymańnie i niadopusk advakataŭ da Viktara i Eduarda Babarykaŭ my ličym pramym parušeńniem pravoŭ čałavieka. Toje, što my daviedvajemsia ab zaviedzienaj kryminalnaj spravie i zatrymańni ź dziaržaŭnych telekanałaŭ — my ličym absurdam. Toje, što zaraz adbyvajecca ź Viktaram i Eduardam, pakazvaje, ź jakim cynizmam stavicca biełaruskaja dziaržava da svaich hramadzian. Chamstva, hvałt, šantaž, pahrozy, prynižeńnie i vysmaktanyja z palca abvinavačvańni — z hetym sutykajecca kožny hramadzianin. Nastaŭnik, jakoha prymušajuć źbirać podpisy, rabočy, jakomu biaskonca pahražajuć razryvam kantraktu, miedsiastra, jakuju pazbaŭlajuć premii pry žabrackaj zarpłacie, pradprymalniki i biznesmieny, jakich trasuć pravierkami i vymahajuć u ich chabaru, piensijaniery, jakich prymušajuć vyžyvać i ličyć kožnuju kapiejku, milicyjaniery, jakich prymušajuć parušać zakon, jaki jany pavinny abaraniać. My pavinny źmianić heta razam. Nie ludzi dla dziaržavy, a dziaržava dla ludziej!» — havorycca ŭ paviedamleńni.
