Alaksandr Baŭkunovič z ahraharadka Zaastraviečča, što pad Kleckam, pamior 15 červienia.
«U jaho byŭ reŭmatoidny artryt, jaki davaŭ prablemy. Było i raniej takoje, što lažaŭ u balnicy z žyvatom, byŭ navat kryvaciok z kišačniku, — raspaviała «Našaj Nivie» žonka Alaksandra.
— Niedzie ŭ pačatku červienia muž znoŭ pačaŭ chvareć žyvatom. Pajšoŭ da miascovaj doktarki. Taja pryznačyła lačeńnie, adpraviła jašče i na zdymki lohkich, chacia muž na prastudu nie skardziŭsia — tolki žyvot baleŭ mocna. Muž paśla jašče schadziŭ da jaje na pryjom. Paśla vychodnyja pravioŭ doma.
Ale paśla vychodnych stała jamu vielmi kiepska, tak baleŭ žyvot, što jon až kryčaŭ. A pieršaj hadzinie nočy ja vyklikała chutkuju, muža zabrali. Tak baleła jamu, što z chaty vynosili na nasiłkach.
Muža adpravili ŭ balnicu ŭ Kleck. Paśla ŭ Niaśviž adpravili, tam pravieryli nyrki. Skazali, vynik budzie ŭ paniadziełak. Ale da vynikaŭ muž nie dažyŭ — 15 červienia nam pazvanili, skazali, što jon pamior. 16-ha my jaho zabrali ŭ zakrytaj trunie i pachavali».
Žonka kaža, što ŭ balnicy ŭ Alaksandra ŭziali analizy i vyjavili karanavirus.
«Ale mianie na «karonu» nichto nie praviaraŭ. Prosta skazali pasiadzieć doma da 22 červienia. Analizy nie rabili. Adčuvaju ja siabie narmalna. Dy i ŭ muža, pakul doma byŭ, byli tolki prablemy z žyvatom. Tamu ja nie vyklučaju, što «karonaj» jon moh zarazicca ŭžo ŭ samoj balnicy [časam karanavirus prajaŭlajecca nie praz kašal, ale mienavita kišačnymi prajavami — NN], — kaža žančyna. — Niaviestka kazała, što ŭ zaklučeńni ab śmierci ŭ Alaksandra šmat čaho: i reŭmatoidny artryt, i tromby, i nyrkavaja niedastatkovaść, i išemičnaja chvaroba serca… Ale tam ŭ kancy nibyta byŭ paznačany i kavid».
Alaksandru Baŭkunoviču było 59 hadoŭ. Jon pracavaŭ leśnikom. U mužčyny zastałosia dvoje darosłych synoŭ i dvoje ŭnukaŭ.
