Fiermier z Homielščyny i siabra błohiera Cichanoŭskaha Juryj Hancevič zajaviŭ pra svoj namier iści ŭ prezidenty.

Juryju 44 hady. U ahraharadku Pakalubičy Homielskaha rajona jon trymaje svaju ahrasiadzibu. Piaty hod zajmajecca fiermierstvam: razvodzić karoŭ, koz, aviec — kala 100 hałoŭ na padvorku. Pracuje adzin, biez najomnych rabotnikaŭ.

Letaś jon udzielničaŭ u parłamienckich vybarach. Juryj zapomniŭsia pikietam, na jaki pryhnaŭ traktar, kazu i karovu. Tady ž mužčyna i staŭ błohieram (viadzie jutub-kanał «Narodny deputat»).

U prezidenty źbirajecca, kab zmahacca z «anarchijaj čynoŭnikaŭ». 

«Idu, bo čynoŭniki nas nie čujuć. Mahčyma, ja b zajmaŭsia inšaj spravaj u hety pieryjad, ale pakolki mnie nie vydzialajuć ziamlu, nie dajuć raźvivacca, u mianie jość volny čas paŭdzielničać u vybarach», — adznačaje fiermier.

Kaža, što jość nadzieja, što jaho zarehistrujuć.

«Na parłamienckich vybarach nie vieryŭ, ale ž zarehistravali. Źbirajecca inicyjatyŭnaja hrupa, kala 100 čałaviek užo jość. Heta nie tolki z Homiela — z usioj Biełarusi».

Juryj adznačaje, što svaju kandydaturu vystaviŭ pa prośbie błohiera Siarhieja Cichanoŭskaha, jaki ciapier znachodzicca pad vartaj. 

«U pracesie kampanii na parłamienckich vybarach Siarhiej Cichanoŭski prajaŭlaŭ aktyŭny ŭdzieł, byŭ majoj davieranaj asobaj. Tamu ja jamu daviaraju, a jon mnie. Mianie šmat chto prosić iści ŭ prezidenty — siabry, padpisčyki», — dadaje fiermier.

Ź Cichanoŭskim jon paznajomiŭsia letaś.

«Jak moj błoh pačaŭ nabirać papularnaść, jon źniaŭ sa mnoj rolik na poli. U nas źjavilisia ahulnyja intaresy. Siarhiej taksama sprabavaŭ zaniacca ahraturyzmam, jamu pałki ŭ koły ŭstaŭlali».

Pa słovach Juryja, davieranaść Cichanoŭski paśpieŭ pieradać dvum ludziam.

«My budziem rabić inicyjatyŭnyja hrupy z zapasam, kab pravakatary nie sarvali nam płany. Ja budu zapasnym varyjantam, bo padpisčyki Siarhieja mianie padtrymlivajuć, u nas adnolkavaja pazicyja», — kamientuje fiermier.

Biudžet pieradvybarčaj kampanii Juryj jašče nie płanavaŭ. Ličyć, što zatraty buduć nievialikija — prynamsi tak było padčas parłamienckich vybaraŭ.

«Dumaju, kali budzie mahčymaść finansavaja, ludzi, jakija chočuć bačyć mianie ci Siarhieja Cichanoŭskaha ŭ prezidentach, dapamohuć», — kaža mužčyna.

U jaho videazvarocie na šyldzie źmieščany hierb «Pahonia». Pytajemsia, čamu takoje rašeńnie.

«A heta mnie tak padpisčyk zrabiŭ. Rekłamščyki prosta pazvanili, skazali, kali naš aficyjny hierb zrobim, mohuć być prablemy, bo papiery dla ahitacyi byccam dakumientami ličacca. Padpisčyk prapanavaŭ tak. Z adnaho boku, dziela pryšpiłu, a ź inšaha, štości ž dla biełarusaŭ aznačaje».

«Dla vas aznačaje štości?»

«Heta naš stary hierb. Kali ja słužyŭ u armii, ja huziki nasiŭ ź im».

U lutym na kanale «Biełaruś-1» u prahramie «Zona Ch» źjaviŭsia siužet, jak Juryj nabraŭ u kramie tavaraŭ, ale raźličyŭsia tolki za častku, a ŭ kišeniach chacieŭ źnieści kradzienaje. Fiermier zapeŭnivaje: heta mantaž i pravakacyja.

«Ni na adnym videa niama momantu, jak ja kradu niešta. U mianie ŭsie čeki jość. Ja spačatku nabraŭ ceły košyk budmateryjałaŭ, raźličyŭsia, advioz u mašynu, a potym viarnuŭsia tolki za trosam. A ŭ kišeni mnie chtości padkinuŭ tyja detali. Ja pahadziŭsia raźličycca i pryznaŭ vinu, kab nie adpravili na sutki, bo ŭ mianie karova naradžać pavinna była, mnie nie da taho! Ničoha b usio roŭna nie dakazali, choć Siarhiej Cichanoŭski prapanoŭvaŭ sudzicca. U vyniku dali štraf try bazavyja».

Kali z prezidenctvam nie atrymajecca, u Juryja vialikija płany na haspadarku. Choča zapuścić realici-šou.

«U mianie ŭstalavanyja 28 kamier, jakija buduć pakazvać usio ŭ pramych efirach. Chočam zrabić taki prajekt, kab ahraturysty pryjazdžali i mahli pasprabavać viaskovy byt, a inšyja aceńvali, jak u ich heta atrymlivajecca. Typu «Dom-2», ale z žyviołami», — dzielicca fiermier.

Клас
0
Панылы сорам
0
Ха-ха
0
Ого
0
Сумна
1
Абуральна
0

Chočaš padzialicca važnaj infarmacyjaj ananimna i kanfidencyjna?