Žytkavičy.

Žytkavičy.

Siońnia ŭ Žytkavičach pachavali 63-hadovaha Mikałaja Ciareniu. Jon pracavaŭ na matorabudaŭničym zavodzie, u supracoŭnicy jakoha znajšli karanavirus, a potym «adklikali» dyjahnaz. U piatnicu Mikałaj trapiŭ u špital u Homli. U subotu — pamior, piša Radyjo Svaboda.

Vital, syn Mikałaja, raspavioŭ Svabodzie, što ŭ daviedcy pra śmierć napisali «Vostraja reśpiratarnaja niedastatkovaść, virusnaja pneŭmanija».

«Skazali chavać u zakrytaj trunie», — zaznačyŭ Vital. Pra karanavirus u daviedcy nie napisana, i vusna synu skazali, što COVID-19 u Mikałaja nie było.

Jahonaja maci i plamieńnica trapili ŭ Žytkavicki špital jak mahčymyja kantakty. Ale testy ŭ ich dali admoŭny vynik. «Maci siońnia rankam vypisali», — dadaŭ žychar Žytkavičaŭ.

«Tatu było błaha 6 krasavika, padymałasia temperatura, jon vyklikaŭ lekara na dom. Jaho zabrali spačatku ŭ rajonny špital, była dvuchbakovaja pneŭmanija. U piatnicu jaho zabrali ŭ Homiel. U subotu patelefanavali adtul, što jon pamior. Skazali, što admovilisia pracavać nyrki i serca», — kazaŭ 13 krasavika Vital.

22 sakavika ŭ žycharki Žytkavičaŭ, jakaja pracuje na matorabudaŭničym zavodzie, znajšli karanavirus. Jana trapiła z pneŭmanijaj u Homielski suchotny špital. Paźniej Ministerstva achovy zdaroŭja paviedamiła, što test daŭ pamyłkovy vynik. Tym nia mienš zavod apracoŭvali dezynfekcyjnymi srodkami.

Žančyna dahetul prachodzić lačeńnie ŭ suchotnym špitali ŭ Homli.

Na Žytkavickim matorabudaŭničym zavodzie 13 krasavika nichto z kiraŭnictva nie zdymaŭ słuchaŭku. Byłaja supracoŭnica zavodu paviedamiła Svabodzie, što na pradpryjemstvie zachvareła sakratarka pryjomnaj, jana ŭ špitali. Jašče 10 supracoŭnikaŭ zavodu — na samaizalacyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?