22 lutaha ŭ minskim kulturnym chabie «OK16» (vuł. Kastryčnickaja, d. 16, k. 27) «Art Siadziba» źbiraje razam 50 biełaruskich kampanij, arhanizacyj, inicyjatyŭ i tvorčych kalektyvaŭ, kab hodna pravieści maštabnaje i ŭnikalnaje śviata «Mova Fest», prymierkavanaje da Mižnarodnaha dnia rodnaj movy.

Bank Dabrabyt staŭ aficyjnym partnioram śviata, a jaho supracoŭniki zrabili jaskravaje videazaprašańnie — źniali atmaśfierny i pryhožy rolik, u jakim čytajuć vierš «Mova» paetki Haliny Pirožnik.

Uśmichajecca i čytaje vierš u roliku i staršynia praŭleńnia AAT «Bank Dabrabyt» Lichahrud Ihar Viktaravič:

— Naš bank, paśla rebrendynhu ŭ minułym hodzie, staŭ biełaruskamoŭnym jak u naźvie, tak i ŭ vialikaj kolkaści spraŭ. My adrazu stvaryli viersiju nie tolki sajta banka pa-biełarusku, a i mabilnaha dadatku «Dabrabyt-anłajn». Pakiet pasłuhaŭ «Vyšejšaja liha», kartki «Matula» i «Davaj-davaj», prahrama łajalnaści «Koła», układy «Ščodry» i «Na maru» — heta tolki častka praduktaŭ našaha banka ŭ nazvach jakich vykarystoŭvajecca biełaruskaja mova. Tamu biezumoŭna my z zadavalnieńniem pryniali prapanovu «Art Siadziby» stać nie prosta aficyjnymi partniorami, a i aktyŭnymi ŭdzielnikami «Mova Fest».

Bank Dabrabyt rychtuje dla śviata «Mova Fest» svaju placoŭku, dzie raźmieścicca fotazona, jakaja stanie častkaj moŭnaha kvestu. Dzietki i ŭsie naviedniki śviata zmohuć zrabić sełfi z talismanam banka — božaj karoŭkaj Jevaj Dabrabyt, jakaja stała hierainiaj admysłovaha stykierpaku, jaho možna spampavać u Telegram'e.

22 lutaha a 14.00 na feście ŭ miežach adukacyjnaj placoŭki «Hodna» pres-sakratar Banka Dabrabyt Alaksiej Ramančuk prymie ŭdzieł u adkrytaj dyskusii «Biełaruskaja mova i biźnies» razam z Alenaj Patapovič, namieśnicaj dyrektara pa markietynhu partału Realt.by; Alaksandram Apiejkinym, dyrektar handbolnaha kłuba «Viciaź-Leon»; Ałaj Laciaha, kiraŭnicaj departamienta karparatyŭnych adnosinaŭ AAT «Pivavarnaja kampanija Alivaryja»; Mikitam Broŭkam, namieśnikam dyrektara TAA «Symbal Baj». Viadučy dyskusii: Arciom Harbacevič, žurnalist «Našaj Nivy».

Ahułam na šaści tematyčnych placoŭkach «Mova Fest»:

  • pakaža i raskaža pra dasiahnieńni biełaruskaj movy za apošnija 10 hadoŭ;
  • źbiare razam biźnies i hramadskija inicyjatyvy, aktyvistaŭ i tvorčuju intelihiencyju, NDA i prosta aktyŭnych biełarusaŭ, jakija vučać, padtrymlivajuć, papularyzujuć i raźvivajuć biełaruskuju movu;
  • prademanstruje rečy, źjavy, vyraby, roznyja pradukty dy mastackija tvory, jakija stvarajucca pa-biełarusku ci pryśviečanyja biełaruskaj movie;
  • prezientuje raznapłanavaść i raznastajnaść nośbitaŭ biełaruskaj movy.

Aficyjny chešteh śviata #movafest daje mahčymaść nie tolki sačyć za padrychtoŭkaj i praviadzieńniem śviata, ale i vyjhravać padarunki ad partnioraŭ. Śviata 22 lutaha ŭ kulturnym chabie «OK16» pačniecca a 13-j hadzinie i budzie doŭžycca da 22.00. Uvachod volny.

Kiraŭnik «Art Siadziby» Aleś Śnieh kaža:

— Naša arhanizacyja štohod pravodzić raznastajnyja mierapryjemstvy da Dnia rodnaj movy i pryjemna, što maštab hetych padziej z kožnym hodam pavialičvajecca, dałučajucca novyja arhanizacyi i inicyjatyvy, svaje mierapryjemstvy pravodziać studenty va ŭniviersitetach, vučni ŭ škołach, vialikija kampanii i maleńkija firmy, usie sprabujuć prydumać niešta aryhinalnaje i cikavaje. Sioleta my vyrašyli maksimalna raznastaić prahramu śviatkavańnia i pakazać šyroki śpiektar vykarystańnia biełaruskaj movy ŭ roznych śfierach žyćcia. I vielmi pryjemna, što našu ideju i fiestyval padtrymali paśpiachovyja i viadomyja kampanii Biełarusi.

U hetym hodzie na 700 kvadratnych mietrach kulturnaha chaba «OK16» 22 lutaha ceły dzień budzie hučać biełaruskamoŭnaja muzyka: fołk ad Sieržuka Doŭhušava i hurta Vuraj, rep ad Zrabi i Gleboki Smak, papularnaja ad VAL, Hanny Šarkunovaj, Maryi Jermakovaj, Lear i Lery Jaskievič, rok ad hurtoŭ «Mutnajevoka», Akute i chedłajniera śviata — hurta Volski ź lepšymi pieśniami lehiendarnaha biełaruskaha muzyki Lavona Volskaha.

Viadomyja ludzi na adkrytaj dyskusijnaj placoŭcy buduć abmiarkoŭvać razam z žurnalistam «Jeŭraradyjo» Źmitrom Łukašukom nacyjanalnuju ideju Biełarusi, biźniesoŭcy razam z žurnalistam «Našaj Nivy» Arciomam Harbacevičam — biełaruskuju movu ŭ biełaruskim biźniesie, a «Radyjo Svaboda» zaprosić na pryščepku biełaruskaj movy, movaznaŭca Vincuk Viačorka raskaža i pakaža, jakija typovyja, i časam śmiešnyja, pamyłki robiać pačatkoŭcy dy jak ad ich vylekavacca.

Moŭny kvest daść mahčymaść usim naviednikam śviata pravieryć u niečakanych farmatach svajo viedańnie biełaruskaj movy, a «Mova Bar» — pasłuchać z kuflem piva vieršy siabroŭ PEN-Centra i Sajuza biełaruskich piśmieńnikaŭ.

Uvieś dzień budzie pracavać spartovaja placoŭka ad Leon.by, na joj Vital Hurkoŭ pradstavić majstar-kłas «Tajski boks pa-biełarusku». Paralelna na stendzie «Čyrvonaha kryža» i «Terytoryi dapamohi» projdzie majstar-kłas pa pieršaj dapamozie, dzie budzie mahčymaść pa-biełarusku pavučycca vyratavańniu žyćcia darosłaha i niemaŭlaci ŭ vypadku spynieńnia dychańnia, daviedacca, dzie možna prajści navučańnie pieršaj dapamozie pa Jeŭrapiejskich standartach.

Na dziciačaj placoŭcy «Naša Niva» prezientuje svaje časopisy «Dudu» i «Aściarožna, dzieci!» dy padrychtuje interaktyŭnyja zabavy razam z aŭtarami vydańniaŭ, a kampanija «Budźma biełarusami!» pradstavić interaktyŭnuju hulniu-śpiektakl «Pa śladach adnaho padańnia».

Ciaham usiaho śviata buduć pracavać vuličnaja placoŭka z fudtrakami «Smačna ŭ rocie» i proma-placoŭka «Mova, hramadstva, biźnies» z aktyŭnaściami, stendami, handlovymi punktami ad partnioraŭ «Mova Fest», a zabaŭlać haściej śviata biełaruskimi tradycyjnymi hulniami, zabavami i tancami buduć studyja «Varhin» i kapeła «Koliśnija».

Клас
0
Панылы сорам
0
Ха-ха
0
Ого
0
Сумна
0
Абуральна
0