BiełTA
Biełaruś praciahnie zakupać naftu ŭ inšych krainach, navat kali jana budzie daražejšaja za rasijskuju. Pra heta Alaksandr Łukašenka zajaviŭ siońnia na sustrečy z kalektyvam Śvietłahorskaha CKK, pieradaje BIEŁTA.
Padčas pieramovaŭ u Sočy Uładzimir Pucin zasumniavaŭsia, što biełaruski bok praciahnie kuplać naftu ŭ inšych krainach. «Navošta vy budziecie heta rabić, kali jana ŭsio roŭna daražejšaja za rasijskuju?» — spytaŭ jon.
Łukašenka zajaviŭ, što Biełaruś praciahnie dyviersifikavać zakupki. «Kab kožny hod 31 śniežnia a dvanaccataj hadzinie nočy nie stajać na kaleniach, — rastłumačyŭ kiraŭnik dziaržavy. — Tak być nie pavinna, i tak nie budzie».
Łukašenka padkreśliŭ, što Biełaruś nie budzie płacić premii rasijskim naftavym kampanijam, tym bolš kali jany pastaŭlajuć pradukt pa suśvietnaj canie. «My nie prosim tannuju naftu. My kupim pa suśvietnaj canie i pierapracujem. I heta vyhadna dla kampanij», — zajaviŭ jon.
«U Sočy my damovilisia, što ŭrad Rasii i asabista namieśnik kiraŭnika Administracyi Dźmitryj Kozak buduć kantralavać hetaje pytańnie i dapamohuć nam damovicca. Heta značyć pajšoŭ sihnał: kali Biełaruś z kimści damaŭlajecca, dapamažycie pa trubie im pastavić hetuju naftu z Rasii.
Ja nikoha nie šantažavaŭ, skazaŭ: kali z Rasii nie budzie pastaŭlena nafta ŭ patrebnych abjomach (mižuradavaje pahadnieńnie na 24 młn t, u studzieni jany pastavili ŭsiaho 500 tys. t — 1,5 młn t niedapastavili), my pačniom adbor z tranzitnaj truby.
Praz krainu na Zachad i dla Biełarusi prapampoŭvajecca 70 młn t nafty. I jany nie majuć nijakich prablem. My sumlenna, sumlenna pampujem hetuju naftu. Pamiatajecie letam brudnuju naftu? Da hetaha času nie raźličylisia za heta, choć u nas vyjšła sa stroju abstalavańnie ŭ Mazyry, Navapołack paciarpieŭ i naftapravod «Družba». Tamu, kali nie pastaviać u lutym, budziem da 2 młn t dabirać», — papiaredziŭ Alaksandr Łukašenka.
Akramia taho, pavodle jaho słoŭ, Biełaruś prapracoŭvaje pytańnie pastavak nafty z polskimi partniorami. «My zaraz z Hdańska (kupim u Saudaŭskaj Aravii, Emirataŭ, Złučanych Štataŭ Amieryki) pastavim pa trubie», — raskazaŭ Łukašenka. U Biełarusi taksama razhladajuć varyjant pastavak nafty ź ES reviersam pa adnoj z halinak naftapravoda «Družba». Tady ŭžo nie Rasija budzie pa im pastaŭlać naftu na Zachad, a Biełaruś pampavać ź Jeŭropy.
Dla pastavak taksama zadziejničajuć bałtyjskija party. Tut mohuć akazać sadziejničańnie Złučanyja Štaty. «Ja prybałtam prapanuju: my možam kupić naftu na Bałtycy, zapampavać praź Litvu ci Łatviju (jak damovimsia), pierapracujem i zabiaśpiečym uvieś prybałtyjski rehijon», — raskryŭ schiemu Navapołackaha NPZ kiraŭnik dziaržavy. Takim ža čynam zmoža pracavać i zavod u Mazyry: nafta da jaho pastupić praz Čornaje mora, a pradpryjemstva zatym zabiaśpiečyć svajoj pradukcyjaj usiu Ukrainu i častkova Jeŭropu.
Adkazvajučy na zaŭvahi z rasijskaha boku datyčna darahoŭli takich padychodaŭ, Alaksandr Łukašenka nahadaŭ, što ŭ svoj čas jany vydzielili dziasiatki miljardaŭ dalaraŭ na budaŭnictva Tureckaha i Paŭnočnaha patokaŭ. Choć mahli značna tańniej pastaŭlać haz praz Ukrainu, navat pryniaŭšy dadatkovyja ŭmovy Kijeva. Ale ŭ Rasii zajavili, što na heta nikoli nie pojduć z pryncypu, i vyrašyli budavać hazapravody ŭ abychod hetaj krainy. «Dakładna tak i ja kažu «nie». My budziem pa hetych maršrutach prapracoŭvać alternatyŭnyja pastaŭki nafty, — dadaŭ Łukašenka. — My adkryta, sumlenna kažam pra hetuju łahistyku».
U cełym niadaŭnija pieramovy ŭ Sočy Alaksandr Łukašenka acharaktaryzavaŭ jak «žorstkuju i ščyruju razmovu». «Pa nafcie, jak my i prasili, — suśvietnaja cana biez usialakich premij. Biez usialakich źnižak, nam nie patrebnyja nijakija źnižki», — zajaviŭ kiraŭnik dziaržavy.
