Razborki ŭ akvaparku, fota z fejsbuka Franaka Viačorki.
U akvaparku «Lebiadziny» naviednikam prapanoŭvajuć chałaty i ručniki. Adnak nie ŭsie viedajuć, što ich paśla treba zdavać. Praz heta ŭ žurnalista i błohiera Franaka Viačorki adbyŭsia kanflikt z administracyjaj ustanovy. U vynik ŭmiašałasia milicyja.
Zdareńnie adbyłosia ŭ niadzielu 9 lutaha. Viačorka nazvaŭ situacyju «trešavaj»
«Na ŭvachodzie ŭsim dajuć chałaty i ručniki, pa zmoŭčańni. Nijakich raśpisak i vusnych papiaredžańniaŭ, što hetyja čortavyja chałaty treba zdać i za imi pilna sačyć, kab nie daj boh. Tak stałasia, što niechta pierabłytaŭ, ci ŭziaŭ, ci pierakłaŭ našy chałaty (moj i inšych niebarak) — pra što my skazali administrataram na vychadzie. Vidavočna, chałaty niedzie lažać, i naŭrad ci niechta hetyja nie pieršaj śviežaści chałaty budzie vykradać», — napisaŭ Viačorka ŭ svaim fejsbuku.
Franak Viačorka viadomy jak śpiecyjalist pa sacyjalnych sietkach i novych miedyja.
Achoŭnik kaža: «Biez prablem, ja pahladžu kamiery». Praz 30 chvilin viartajecca: «Nie, ja nie mahu vam dapamahčy pa techničnych pryčynach… Tamu vy napišycie raśpisku, prykładzicie pašpart, i ŭsio». Hladžu raśpisku: «Ja, taki taki, kampiensuju košt chałataŭ…» Ja ŭ šoku. Usie ŭ šoku. Jasna, što pisać jaje admovilisia», — piša Viačorka.
Adnak administracyja akvaparka zapatrabavała kampiensavać košt zhublenych chałataŭ.
Nieparazumieńni pamiž naviednikami i administracyjaj ustanovy pryviali da taho, što supracoŭniki akvaparka vyklikali milicyju.
Milicyjaniery paśla dźviuch hadzin raźbiralnictvaŭ prapanavali supracoŭnikam akvaparka i naviednikam napisać zajavy. Ale i tyja, i tyja pisać ich u vyniku nie stali, a znajšli kampramisny varyjant: naviedniki, u jakich źnikli chałaty, napisali tłumačeńnie dla akvaparka, čamu tak adbyłosia.
Franak Viačorka aburany navat nie tym, što vyklikali milicyju, a tym, što akvapark nie papiaredžvaje pra poŭnuju adkaznaść naviednikaŭ za ručniki i chałaty.
Administracyja akvaparka tłumačyć situacyju nastupnym čynam:
«Usich haściej administratary-kasiry papiaredžvajuć ab tym, što chałat i ručniki nieabchodna viarnuć pry vychadzie. Heta taksama prapisana ŭ praviłach naviedvańnia akvaparka: «Chałat, ručniki, vydadzienyja na ŭvachodzie, pavinny być pradjaŭlenyja i zdadzienyja pry vychadzie. U vypadku zhuby ci psavańnia viartajecca košt ručnika ci chałata ŭ adpaviednaści z prejskurantam».
Hetaja ž infarmacyja ŭkazanaja i na sajcie ŭstanovy.
«Kali vy bieracie niejkuju reč u karystańnie, łahična, što vy pavinny viarnuć jaje nazad. Kankretna hetamu naviedniku my prapanavali try varyjanty vyjścia ź situacyi.
Naviednik moh viarnucca na terytoryju spa i samastojna pašukać zhubleny chałat. Moh apłacić košt zhuby. Ci treci varyjant: naviednik piša raśpisku ab tym, što jon abaviazany apłacić košt chałata, kali administracyja akvaparku nie znojdzie jaho paśla zakryćcia ŭstanovy. Ad usich troch prapanavanych varyjantaŭ naviednik admoviŭsia, paprasiŭ sam vyklikać milicyju. Tamu raźbiralnictva zaciahnułasia», — tłumačyć administracyja.
Što tyčycca skarhi Franaka Viačorki nakont taho, što možna było b zrabić skrynki dla zachavańnia chałataŭ abo prysvoić niejkija numarki ci pryšyć čypy, kab nielha było niezaŭvažna vynieści ich z zony, administracyja adkazvaje:
«Dla chałataŭ na terytoryi vodna-termalnaj zony arhanizavany viešałki i padśvietka zony zachoŭvańnia. Akramia taho, jość infarmacyjnyja šyldački z ukazańniem praviłaŭ naviedvańnia i viartańnia arendnych chałataŭ. Heta suśvietnaja praktyka: naviedniki vodnych kompleksaŭ, hatelaŭ, sportkompleksaŭ, — usie viartajuć ručniki-chałaty i inšy invientar paśla akazanych pasłuh», — zapeŭnivajuć u akvaparku.
