Prafiesar Univiersiteta Misury Ann Ościn vyjaviła pa mienšaj miery siem staražytnajehipieckich mumij, na skuru jakich pry žyćci byli naniesienyja mudrahielistyja rytualnyja tatuiroŭki, piša bbc.com.

Tatuirovka na šieje mumii

Ann Ościn, Univiersitet Misury.

Choć sami zabalzamavanyja cieły byli daŭno vyvučanyja navukoŭcami (niekatoryja mumii dziesiacihodździami zachoŭvalisia ŭ muziejach), malunki, jakija pakryvali ich, da apošniaha času zastavalisia niezaŭvažanymi.

U pracesie mumifikacyi skura ciamnieje, a naniesienyja pad jaje atramant, naadvarot, śviatleje, tak što z časam tatuiroŭki robiacca praktyčna niabačnymi dla vačej.

Mastactva tatuiroŭki viadoma z najstaražytnych časoŭ. Malunki byli vyjaŭlenyja, naprykład, na rukach Ałtajskaj pryncesy, jakaja žyła prykładna 2500 hadoŭ tamu, a taksama na skury ledzianoj mumii Etcy Ajsmana, uzrost jakoj składaje kala 5300 hadoŭ.

Da niadaŭniaha času było pryniata ličyć, što tatuiroŭki ŭ Staražytnym Jehipcie rabili prastytutki. Zaraz hetuju hipotezu daviadziecca pierahledzieć: vyjaŭlenyja ŭ niekropali Dejr-el-Miedzina žančyny vidavočna mieli vysoki status.

U 2014 hodzie Ościn ŭpieršyniu vyjaviła słaba adroznyja znaki na šyi adnoj z mumij ź fivanskaha niekropala. Pieršapačatkova prafiesar vyrašyła, što malunak naniesieny pa skury, adnak dalejšyja daśledavańni pakazali, što heta tatuiroŭka.

Kab razhladzieć znaki lepiej, Ościn sfatahrafavała ich u infračyrvonym dyjapazonie — i atrymała jasnyja vyjavy ijerohlifaŭ.

Tady jana vyrašyła zrabić anałahičnyja fatahrafii inšych častak cieła žančyny — i vyjaviła na skury mumii bolš za 30 raniej nie zaŭvažanych malunkaŭ.

Siarod ich byli vyjavy sakralnych simvałaŭ nakštałt voka Hora, a taksama kobry, małpy, karovy, skarabieja i roznych raślin. Miarkujučy pa raźmiaščeńni tatuirovak — naprykład, na łapatkach ci pajaśnicy — žančyna rabiła ich nie sama, a karystałasia pasłuhami majstra.

Bolšaść malunkaŭ raźmiaščalisia ŭ miescach, jakija naŭrad ci byli schavanyja pad adzieńniem — heta dazvoliła daśledčykam vykazać zdahadku, što tatuiroŭki rabilisia napakaz. A ŭličvajučy charaktar ​​malunkaŭ, navukoŭcy schilajucca da dumki, što pry žyćci žančyna była lekarkaj abo žrycaj.

«Voka Hora vytatujavanaje ŭ jaje na šyi śpieradu, na abodvuch plačach pa bakach, a taksama na śpinie. Ź jakoha b boku ni hlanuŭ na hetuju žančynu sučaśnik, na jaho hladzieli vočy božastva», - tłumačyć Ann Ościn.

Akramia taho, na abodvuch ściohnach žančyny byli znojdzienyja tatuiroŭki ŭ vyhladzie kvietak łotasa - takimi ž malunkami ŭ Staražytnym Jehipcie zvyčajna ŭpryhožvali chramy Chatchor, staražytnajehipieckaj bahini nieba, maciarynstva i ŭradlivaści. Nie vyklučana, što žančynu ličyli jaje ziamnym uvasableńniem.

Uzbroiŭšysia mietadam infračyrvonaj fatahrafii, Ościn raspačała vyvučeńnie inšych staražytnajehipieckich mumij. I za piać hadoŭ joj udałosia vyjavić schavanyja časam malunki jašče na šaści zabalzamavanych ciełach.

Usie jany naležali žančynam, na mužčynskich mumijach tatuirovak nie znajšłosia. Tłumačeńnie hetamu navukoŭcam jašče treba adšukać.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?