Najlepšyja šmatsieryjnyja stužki, jakija možna ŭbačyć u pieršy miesiac zimy. U našym śpisie buduć jak premjery, tak i sieryjały, jakija viartajucca ŭ efir paśla pierapynku.

«Vikinhi» (Vikings)

Histaryčnaja drama. Kanada, Irłandyja, 6-y siezon

Pryhody lehiendarnaha skandynaŭskaha konunha (karala) Rahnara Łodbraka i jahonych synoŭ prychodziać da skančeńnia. Šosty siezon stanie apošnim u historyi sieryjała.

«Vikinhi» — adzin z najpapularniejšych sieryjałaŭ sučasnaści. Tut jość usio: batalnyja bitvy, śmierci, kachańnie, seks, zdrady, pałacavyja pieravaroty, chryścijanstva i pahanstva. Atrymlivajecca całkam sabie vybuchovy kaktejl.

U apošnich siezonach, paśla śmierci Rahnara Łodbraka (chutčej za ŭsio, heta zborny vobraz niekalki skandynaŭskich pravadyroŭ) na hałoŭnyja roli ŭ sieryjale vychodziać jahonyja syny Bjorn Žaleznaboki i Ivar Biaskosny. Bjorn staŭ razvažlivym i rachmanym, mužnym vajarom, ale tak sabie strateham. A voś Ivar, chaj jon i kaleka, uvasobiŭ u sabie prahu da ŭłady, žorstkaść, chitraść, rozum.

Dla nas cikavaść šostaha siezona «Vikinhaŭ» ujaŭlaje jašče praz toje, što častka dziejańnia budzie adbyvacca na słavianskich ziemlach, a adnym z hierojaŭ stanie Vieščy Aleh. Darečy, rolu žonki Rahnara — Łahierty — vykanała kanadskaja aktrysa Ketryn Uinik. Heta psieŭdanim, a sapraŭdnaje jaje imia — Kaciaryna Vińnickaja. Jana naradziłasia ŭ Taronta, da vaśmi hadoŭ razmaŭlała tolki pa-ŭkrainsku, chadziła va ŭkrainskuju škołu.

«Dzivosnaja historyja misis Mejzeł» (The Marvelous Mrs. Maisel)

Histaryčnaja drama, kamiedyja. ZŠA, 3-i siezon

U Biełarusi kultura stendapa jašče tolki ŭ dziciačym uzroście. U toj ža čas u ZŠA — heta vialikaja častka šou-biznesu, jakaja maje svaju historyju i armiju prychilnikaŭ. Jość niamała sieryjałaŭ pra stendapieraŭ, i «Misis Mejzeł» adzin ź ich.

Miryjam «Midž» Mejzeł žyvie idealnym žyćciom. U jaje jość kachany muž Džoeł, a taksama syn i dačka. Dekaracyjami da hetaha žyćcia stanovicca Ńju-Jork 1958 hoda. Džoeł čas ad času sprabuje siabie ŭ jakaści komika na scenach baraŭ i načnych kłubaŭ. Praŭda, jahonyja žarty vychodziać zusim nie śmiešnymi.

U adzin momant žyćcio Midž razburajecca, kali jana daznajecca, što muž zdradžvaje joj z sakratarkaj. Žančyna idzie ŭ bar, dzie znachodzić u sabie talent stendapiera. Praŭda, pieršy vychad na scenu skančvajecca tym, što jaje aryštoŭvajuć za aholenyja hrudzi.

«Prastora» (The Expanse)

Kaśmičnaja drama. ZŠA, 4-y siezon

Mnohija ličać hety sieryjał najlepšym z tych, što byli źniatyja pra kosmas za apošnija hadoŭ dziesiać. Dziejańni sieryjała adbyvajucca ŭ tuju paru, kali žychary Ziamli kałanizavali Soniečnuju sistemu. Mars paśla doŭhich vojnaŭ nabyvaje niezaležnaść. Pojas asteroidaŭ, da jakoha naležyć karlikavaja płanieta Cerera, padzieleny na zony pratektaratu miž Ziamloj i Marsam.

U hety samy čas cyničnamu i krychu abyjakavamu detektyvu Mileru daručana znajści źnikłuju dačku miljaniera Džuljetu Maa. Miler, sam taho nie žadajučy, akazvajecca ŭ samym epicentry intryh, palityčnych skandałaŭ, revalucyjanieraŭ i bandytaŭ. Niama takich źjaŭ, jakija pamiž saboj nie źviazanyja. Heta adnačasova i palityčny tryler, i vielmi jakasnaja fantastyka.

«Viadźmak» (The Witcher)

Fentezi, pryhody. ZŠA, Polšča, 1-y siezon

Samaja čakanaja premjera hetaha miesiaca. Cykł knih pra viedźmaka Hieralta z Ryvii polskaha piśmieńnika Andžeja Sapkoŭskaha daŭno ŭžo staŭ kultavym. Heta ŭžo nie tolki litaratura, ale i kampjutarnaja hulnia, i opiera, i šmat čaho jašče. U Polščy ŭžo zdymali sieryjał pa matyvach «Viedźmaka», a ciapier da ekranizacyi tvoru padyšoŭ Netflix.

Padziei adbyvajucca ŭ vydumanym śviecie, jaki vielmi nahadvaje Uschodniuju Jeŭropu (darečy, sieryjał zdymali na terytoryi Polščy, Vienhryi i Słavakii) časoŭ Siaredniaviečča. Hieralt — adzin z apošnich «viedźmakoŭ», jakija jašče isnujuć u tym śviecie. Jon paluje na pačvaraŭ i monstraŭ, vykonvajučy zamovy bahatych apiekunoŭ. Zrešty, Haralt — heta nie biazdumnaja mašyna dla zabojstvaŭ. U jaho jość pryncypy i pierakanańni, jakija časta iduć u razrez z žadańniami zamoŭcaŭ.

Naŭrad ci, kaniečnie, «Viedźmaka» čakaje šalony pośpiech «Hulni tronaŭ», ale pahladzieć, što ŭ vyniku atrymałasia, biezumoŭna, varta.

«Pa praŭdzie kažučy» (Truth be Told)

Jurydyčnaja drama. ZŠA, 1-y siezon

Stryminhavy servis Apple TV+ praciahvaje nabirać abaroty. U śniežni jany vypuskajuć jašče adnu čakanuju navinku. Sieryjał zasnavany na knizie Ketlin Barbier «Ty śpiš?».

U centry apoviedu žurnalistka Popi Parneł, jakaja viadzie papularny padkast-kanał. Pośpiech da jaje pryjšoŭ paśla raskryćcia hučnaha zabojstva. Adnak praz 18 hadoŭ paśla taho vypadku ŭ spravie znachodziacca novyja detali, jakija mohuć pryvieści da poŭnaha pierarazhladu i navat vyzvaleńnia asudžanaha.

Hladzi taksama: 

Piać sieryjałaŭ, jakija varta pahladzieć u listapadzie

Piać sieryjałaŭ, jakija varta pahladzieć u kastryčniku

Piać sieryjałaŭ, jakija varta pahladzieć u vieraśni

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?