Niebiaśpiečnaja rybnaja pradukcyja trapiła ŭ «nierat» śpiecyjalistaŭ abłasnoj inśpiekcyi Dziaržstandartu pa Viciebskaj vobłaści, piša vitbichi.by. Padčas pravierki ŭ handlovaj sietcy Viciebska jany vyjavili rybnyja presiervy sa šmatrazovym pieravyšeńniem droždžaŭ ŭ składzie.

 

Pad Dziaržnahlad patrapili presiervy rybnyja «Luba jeści» handlovaj marki «VISI» u palimiernaj 200- i 150-hramovaj upakoŭcy (vyrableny TAA «Vičunaj-Ruś»). Ich pastaŭščykom ŭ našu krainu źjaŭlajecca zamiežnaje handlovaje ŭnitarnaje pradpryjemstva «EkaFort», jakoje znachodzicca ŭ Minskim rajonie. Padčas vyprabavańniaŭ u akredytavanaj łabaratoryi vyjaviłasia, što vyraby hetaj marki niekalkich najmieńniaŭ nie adpaviadajuć patrabavańniam techničnaha rehłamientu JEAES «Ab biaśpiecy ryby i rybnaj pradukcyi» pa pieravyšeńni dapuščalnaha ŭzroŭniu droždžaŭ. Ich utrymańnie ŭ charčovaj pradukcyi prosta zaškaliła.

Kali ŭ sieladcy cichaakijanskim salonym u alei z kropam «Carski» utrymańnie droždžaŭ pieravysiła normu ŭ 55 razoŭ, u sieladcy salonym «Aryhinalny» — u 60, dyk u «Asarci ź file-kavałačkaŭ sieladca cichaakijanskaha salonaha i skumbryi atłantyčnaj chałodnaha vendžańnia ŭ alei» — u 140 razoŭ. Sieladziec cichaakijanski file-kavałački salony ŭ alei «Da bulby» stała pa vynikach vyprabavańniaŭ antyrekardsmienam. Niepažadanych draždžavych hryboŭ u im vyjaviłasia ŭ 400 (!) razoŭ bolš za dapuščalnuju normu. Užyvańnie takich kansiervaŭ moža prynieści škodu zdaroŭju, asabliva ŭ ludziej z panižanym imunitetam.

Dziaržstandart spyniŭ dziejańnie na terytoryi Biełarusi dekłaracyi ab adpaviednaści, jakoj supravadžalisia prakantralavanyja presiervy. Ad pastaŭščyka zapatrabavali vydalić niebiaśpiečnuju pradukcyju z prodažu.

Клас
0
Панылы сорам
0
Ха-ха
0
Ого
0
Сумна
0
Абуральна
0