Najlepšyja šmatsieryjnyja stužki, jakija možna ŭbačyć u apošni miesiac vosieni. U našym śpisie buduć jak premjery, tak i sieryjały, jakija viartajucca ŭ efir paśla pierapynku.

«Karona» (The Crown)

Drama, bijahrafija. ZŠA, Vialikabrytanija, 3-i siezon

Historyja žyćcia karalevy Vialikabrytanii Lizaviety II. Pierad hetym zachodnija kiniematahrafisty źniali bajopik pra žyćcio karalevy Viktoryi.

Cikava paraŭnać pavodziny hetych asob. Viktoryja z małych hadoŭ čakała śmierci svajho dziadźki Vilhielma IV, kab uzyści na tron. Dla Lizaviety sychod jaje baćki Hieorha VI byŭ niečakany. Jana nie rychtavała siabie da karony.

Tajnyja spružyny pałaca, intryhi i pieraškody, ź jakimi sutykałasia karaleva na svaim šlachu, — usio heta ŭ «Karonie». Vielmi cikavaja rola muža karalevy — hiercaha Filipa (kab ažanicca, jon admoviŭsia ad hreckaha pravasłaŭja na karyść anhlikanstva). Heta sapraŭdy ciažkaja noša — być u cieniu svajoj žonki, zastavacca na druhich rolach. Moža, tamu Filip nie zaŭsiody pakazany ŭ pryvabnym śviatle.

U hod premjery «Karona» sabrała vialikuju kolkaść «Załatych hłobusaŭ». Heta i najlepšy dramatyčny sieryjał hoda, i Kłer Foj u roli Lizaviety — najlepšaja žanočaja rola. A jašče Džon Lithou hienijalna vykanaŭ rolu nieparaŭnalnaha Uinstana Čerčyla. U sieryjale chapaje i lubovi, i palityki.

«Kaniec jo…ha śvietu» (The End Of The F***ing World)

Drama, kamiedyja. Vialikabrytanija, 2-i siezon

Džejmsu siamnaccać hadoŭ. U dziacinstvie jon bačyŭ, jak žyćcio suicydam skončyła jaho mama. Chłopiec ličyć siabie psichapatam, ni z kim nie siabruje, a jaho chobi — zabivać maleńkich źviarkoŭ. Jahonaja mara: pierajści na novy ŭzrovień i pasprabavać zabić čałavieka. I tut jamu padvaročvajecca adnahodka Alisa. Jana krychu šalonaja, raśpieščanaja i absalutna niaščasnaja. Dziaŭčyna prapanuje Džejmsu raman, toj pahadžajecca, choć nie adčuvaje nijakich pačućciaŭ. Prosta šukaje ŭdały momant dla zabojstva. U adzin cudoŭny dzień junaki prosta ŭciakajuć z domu na mašynie baćki Džejmsa.

Heta takaja čorna-cyničnaja kamiedyja pra padletkavuju luboŭ dvaich mizantropaŭ. Jana dziŭnaja i mała zrazumiełaja, ale chiba niešta pavinna być vidavočnym? Tut nie budzie ružovych saplej i «žyli doŭha i ščaśliva». Kali hatovyja da trajnoj porcyi firmovaha brytanskaha humaru, to vam siudy.

«Saramatniki» (Shameless)

Kamiedyja, drama. ZŠA, 10-y siezon

Heta ŭžo, mabyć, sieryjalnaja kłasika. Hałoŭny hieroj — Frensis «Frenk» Hałahier, ałkaholik, niahodnik i darmajed. A da ŭsiaho hetaha Hałahier — baćka-adzinočka, u jakoha šaściora dziaciej, jakimi baćku, jasnaja sprava, zusim niama času zajmacca. «Saramatniki» — heta takaja žorstkaja haradskaja drama sučasnaści. I adnačasova nahadvańnie, što ZŠA — heta nie tolki safity Halivuda, ofisy Ńju-Jorku i plažy Santa-Barbary. Dla mnohich i tam žyćcio — heta sucelnaje vyžyvańnie, baraćba za kavałak chleba, ałkahol i nie samy sistemny seks. Razam z tym, hladzieć za pryhodami siamji Hałahieraŭ vielmi viesieła i pakul jašče nie stamlaje.

«Ciomnyja pačatki» (His Dark Materials)

Fentezi, pryhody. Vialikabrytanija, ZŠA, 1-y siezon

Film źniaty pavodle tryłohii brytanskaha fantasta Filipa Pułmana. Heta kniha vychodziła ŭ adzin čas z «Hary Poteram», ale nabyła ŭsio ž mienšuju viadomaść, chacia patencyjał dla kina-bomby tut vidavočny.

U centry apoviedu dziaŭčyna Lira, jakaja žyvie ŭ Oksfardzie, całkam pahružanaja ŭ vučobu. Jaje žyćcio mianiajuć padarožžy: spačatku — u Łondan, a potym — na Paŭnočny polus. U filmie buduć paralelnyja śviety, braniravanyja miadźviedzi, viadźmarki i cyhanskija tabary. Krytyki pierakananyja, što sieryjału nakanavany vialiki pośpiech.

«Dziela ŭsiaho čałaviectva» (For All Mankind)

Fantastyka, drama. ZŠA, 1-y siezon

1 listapada Apple zapuściŭ svaju ŭłasnuju stryminhahavuju płatformu. I startujuć jany cełym šeraham sieryjałaŭ.

Heta alternatyŭnaja historyja (amataram nahadajem, što ŭ hetym miesiacy vychodzić apošni siezon «Čałavieka ŭ vysokim zamku»). Što było b, kali hienijalny saviecki kanstruktar Siarhiej Karaloŭ nie pamior na apieracyjnym stale ŭ 1966? U sieryjale kažuć, što tady pieršyja kroki na Miesiacy zrabiŭ by nie Nił Armstranh, a saviecki kasmanaŭt Alaksiej Leonaŭ. I pačuli my ad Leonava nie pra «maleńki krok čałavieka», a pra zapaviety Lenina. I heta ŭsio padšturchnie amierykancaŭ da jašče bolš intensiŭnaj kaśmičnaj prahramy, što adabjecca na jakaści žyćcia ŭsiaho čałaviectva.

Hladzi taksama:

Piać sieryjałaŭ, jakija varta pahladzieć u kastryčniku

Piać sieryjałaŭ, jakija varta pahladzieć u vieraśni

Piać sieryjałaŭ, jakija varta pahladzieć u žniŭni

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?