Kandydaty ŭ deputaty biełaruskaha parłamienta choć i pryznačajucca zahadam źvierchu, ale heta nie admianiaje usioj rytualnaj dziejnaści, źviazanaj z vybarami. Sustrečy z vybarščykami pravodziać usie. Nie vyklučeńnie i byłaja ministarka infarmacyi Lilija Ananič, jakaja taksama płanuje trapić u Pałatu.
«Naša Niva» naviedała dźvie sustrečy Ananič z vybarščykami ŭ Piečach, rajonie na ŭskrajku Barysava.
Pieršaja prajšła ŭ miascovaj škole №7.
Ananič — heta, kaniečnie, nie kamunist Kliševič. Uzrovień inšy — tamu i na sustreču z kandydatkaj «zaprasili» ŭsich volnych piedahohaŭ i techničnych rabotnikaŭ škoły. Ahułam u zali źmiaściłasia amal 50 čałaviek. Chtości padśmiejvajecca ź mierapryjemstva, chtości ščyra zacikaŭleny «na ziamlačku pahladzieć».
Čytajcie: «Prablemaj z vyhułam sabak buduć zajmacca i deputaty, i prezident!» Jak kamunist Kliševič pravioŭ sustreču z vybarščykami
Vyłučajecca Ananič pa Barysaŭskaj sielskaj akruzie №63, tamu zaraz aktyŭna jeździć pa rajonie. Štodnia ŭ jaje pa try-čatyry sustrečy z vybarščykami. Ananič navat zaviała sabie instahram-akaunt, u jakim vykazvaje zachapleńnie Barysaŭščynaj. Staronka nie nadta cikavaja i davoli kazionnaja, ale sam fakt!
Na pačatku sustrečy ŭ Piečach Ananič raspaviała pra siabie, zatym pačaŭsia standartny manałoh ŭ žanry «za ŭsio dobraje, suprać usiaho kiepskaha».
«Moj hałoŭny pastułat — biełarusy stvaryli niezaležnuju dziaržavu, i heta hałoŭnaje dasiahnieńnie i apłot raźvićcia».
«Ja za spraviadlivaść, biaśpieku, pravavuju abaronu dla kožnaha hramadzianina».
«Ja za dalejšaje dynamičnaje raźvićcio ekanomiki».
«U krainie šmat zroblena dla raźvićcia sielskaj haspadarki. Ahrarny siektar robić vialiki ŭniosak u ekanomiku kraju. Ja vystupaju za raźvićcio fiermierstva i padtrymku bujnatavarnaha ahrarnaha siektara».
«Ja za padtrymku małoha i siaredniaha biznesu».
«Treba zachavać biaspłatnuju miedycynu z akcentam na prafiłaktyku i rańniuju dyjahnostyku».
«My, naščadki, musim zachoŭvać pamiać pra Pieramohu, zachoŭvać mir i padtrymlivać vieteranaŭ vajny».
«Treba padtrymlivać maładyja i šmatdzietnyja siemji. My mahli b na našaj ziamli kamfortna žyć kolkaściu i 20, i 30 miljonaŭ, ale vajna nie dała pryraści nasielnictvu. Paśla nie dali 1990-ja».
«U Barysaŭskim rajonie vostra staić prablema pitnaj vady. I ŭ majoj prahramie ja nadzialaju ŭvahu hetaj temie».
… i hetak dalej.
Nasamreč vystup maksimalna «čynoŭnicki». Leksika takaja ž: «Vašyja słovy — heta zahady dla mianie!» Šmat słovaŭ pra niezaležnuju Biełaruś i dobraje žyćcio ŭ joj: «Biełaruś — dziaržava dla naroda!».
Paśla vystupu adzinaje pytańnie zadała nastaŭnica hieahrafii: maŭlaŭ, šmat razvodaŭ, jak zachavać siemji? Ananič padtrymała zaniepakojenaść. Adkazała, što i ŭ siamji zhubili duchoŭny kod, stali nadta lohka razvodzicca, i ŭ škołach treba b uzmacnić siamiejnaje vychavańnie. Niabłaha było b, kali ŭ ŚMI bolš pisali pra paśpiachovyja šmatdzietnyja siemji.
Akramia taho, taja ž nastaŭnica paprasiła, kab padručniki pisali praktykujučyja nastaŭniki, a nie navukoŭcy, bo atrymlivajecca i nadta składana, i banalna niecikava. Nu i treba b pavialičyć kolkaść urokaŭ hieahrafii.
Na heta Ananič kankretna ničoha nie adkazała. Zatoje paviedamiła, što treba nadzialać bolš uvahi biełaruskaj movie:
«Treba kab dzieci adnolkava dobra viedali dźvie dziaržaŭnyja movy».
Bolš pytańniaŭ u prysutnych nie znajšłosia. Nieviadoma adkul uzialisia sałdaciki, jakija chucieńka razabrali vystavu, pryśviečanuju žančynam na Vialikaj Ajčynnaj vajnie. Hetaja vystava, arhanizavanaja Sajuzam žančyn, jaki ŭznačalvaje Ananič, hastraluje pa rajonie razam z kandydatkaj.
Na druhoj sustrečy, u miascovym Domie kultury, narodu było mienš, čałaviek 20. Schiema taja ž: vystup Ananič z tymi ž tezisami, paśla pytańni.
«Zadavajcie pytańni, dzialiciesia svaimi dumkami, davajcie padkazki!» — zaklikała kandydatka aŭdytoryju.
«Padzialiŭsia dumkami» adzin mužčyna siarednich hadoŭ. Vykazaŭ spadzieŭ, što tak pryhoža, jak abiacała Ananič, i budzie. Paskardziŭsia trochi na prablemy Doma kultury, adsutnaść pandusaŭ dla invalidaŭ, łavak i inšyja niedachopy.
Taksama mužčyna pacikaviŭsia, ci mahčyma tak zrabić, kab da Ananič mahli dazvanicca šarahovyja vybarščyki?
«Padumajem», — paabiacała budučaja deputatka.
A nakont pandusaŭ i łavak parekamiendavała nie saromiecca i brać inicyjatyvu ŭ svaje ruki.
Inšy mužčyna paskardziŭsia, što strašna hladzieć televizar: tam pakazvajuć, što mamy zabivajuć dziaciej! Ananič pahadziłasia: raniej takoha nie było.
Jašče adzin małady chłopiec paviedamiŭ, što ŭ krainie nie kultyvujecca vobraz baćki. Maŭlaŭ, Dzień maci jość, a Dnia baćki — niama. Prablema.
Ananič patłumačyła jamu, što vystupaje za ŭmacavańnie instytuta siamji, a heta i pra mamu, i pra tatu taksama.
«Usie, chto za siamju i za krainu — hałasujcie za maju prahramu!» — zaklikała kandydatka.
Vystupy Ananič łahičnyja, začapicca niama za što — nu a chto suprać niezaležnaści, biaśpieki ci raźvićcia moładzi? Ale ad bolš padrabiaznaha intervju Lilija Ananič admoviłasia — maŭlaŭ, nadta šmat sustrečaŭ i inšaj pieradvybarčaj pracy. Što ž, nie dyk nie.
Tady «Naša Niva» pacikaviłasia, što natchniła čynoŭnicu abzavieścisia instahramam. Ananič adkazała, što nibyta navat sama vystaŭlaje dopisy i publikuje fotki:
«Ja ž žurnalist pa adukacyi. I liču, što kali čałaviek abiraje šlach deputactva, to treba mieć jak maha bolej mahčymaściaŭ pra siabie raskazać i pakazać, čym siońnia žyvie rehijon. Ja imknusia, kab jak maha bolš ludziej pabačyli, jak adbyvajecca vybarčy praces, što ŭjaŭlaje saboju maja prahrama».
Nu i ładna.
