Biełaruś ŭ apublikavanym siońnia rejtynhu Suśvietnaha banka Doing Business — 2019 zaniała 49-je miesca siarod 190 krain śvietu. U paraŭnańni ź minułym hodam Biełaruś apuściłasia na 12 pazicyj, piša tut.by.
Biełaruś adstała ŭ rejtynhu praktyčna ad usich partnioraŭ pa Jeŭrazijskim ekanamičnym sajuzie. Za minuły hod Kazachstan palepšyŭ svaje pazicyi ŭ rejtynhu, uźniaŭšysia z 28-ha na 25-je miesca, Rasija taksama prasunułasia z 31-ha na 28-je miesca. Ariemienija taksama apiaredžvaje Biełaruś — jana zajmaje 47-je miesca (u minułym hodzie — 41-ju pazicyju ŭ rejtynhu). Najhoršyja pakazčyki siarod krain JEAES u Kyrhyzstana — 80-je miesca, u minułym hodzie kraina zajmała 70-je miesca.
Inšyja susiedzi Biełarusi raźmiaścilisia na jašče bolš vysokich miescach: Litva — 11-je, Łatvija — 19-je, Polšča — 40-je. Siarod krain-susiedziaŭ najhoršy pakazčyk va Ukrainy — 64-ja pazicyja ŭ rejtynhu.
U hłabalnym rejtynhu Doing Business užo čaćviorty hod zapar lidarstva trymaje Novaja Ziełandyja. Na druhim miescy znachodzicca Sinhapur, na trecim — Hankonh. U dziasiatcy krain z najbolš spryjalnymi ŭmovami dla pradprymalnickaj dziejnaści za imi iduć Danija, Paŭdniovaja Kareja, ZŠA, Hruzija, Vialikabrytanija, Narviehija i Šviecyja.
Sukupnaja acenka rejtynhu Doing Business składajecca z 10 pakazčykaŭ: rehistracyja pradpryjemstvaŭ, atrymańnie dazvołaŭ na budaŭnictva, padklučeńnie da sistemy elektrazabieśpiačeńnia, rehistracyja ŭłasnaści, atrymańnie kredytaŭ, abarona minarytarnych inviestaraŭ, padatkaabkładańnie, mižnarodny handal, zabieśpiačeńnie vykanańnia kantraktaŭ i dazvoł niepłaciežazdolnaści (dastupnaść pracedury bankructva).
