Vośmy Mižnarodny Kanhres daśledčykaŭ Biełarusi adkryŭsia ŭ Vilni 27 vieraśnia. Jon budzie doŭžycca try dni. Na jaho sabrałasia kala 520 navukoŭcaŭ.
Raniejšyja kanhresy prachodzili pieravažna ŭ Koŭnie, pry padtrymcy Univiersiteta Vitaŭta Vialikaha. Dla sioletniaha placoŭkaju stała Vilnia, a padtrymku nadaŭ Jeŭrapiejski humanitarny ŭniviersitet.
Uračystaje adkryćcio i plenarnaje pasiadžeńnie adbyłosia hetym razam u kaściole Śviatoj Kaciaryny. Jano składałasia ź dźviuch dyskusij.
U abmierkavańni «Hłabalny zruch ułady: nastupstvy dla Uschodniaj Jeŭropy» brali ŭdzieł śpiecyjalisty z ZŠA, Kanady, Biełarusi i Hiermanii. (Robiert Nuryk, Atłantyčnaja rada (ZŠA); Irvin Studzin, Global Brief (Kanada); Skot Kaliniejn, Aljans ZŠA-Jeŭropa (ZŠA); Andrej Kazakievič, «Palityčnaja śfiera» (Biełaruś). Maderavaŭ dyskusiju Jaŭhien Prejhierman, Minski dyjałoh, Biełaruś.
A ŭ histaryčnaj dyskusii «450-hodździe Lublinskaj unii (1569) i jaje značeńnie dla krain rehijona: Biełarusi, Litvy, Polščy, Ukrainy i Rasii» ŭziali ŭdzieł navukoŭcy ź Biełarusi, Polščy, Ukrainy i Litvy. Aleh Dziarnovič, Instytut historyi NAN Biełarusi; Ałvidas Nikžentajcis, Instytut historyi Litvy; Hieranim Hrala, Varšaŭski univiersitet (Polšča); Ihar Skačylas, Ukrainski katalicki univiersitet; Arturas Dubonis, Instytut historyi Litvy; Tomaš Kiempa, Univiersitet imia M. Kapiernika (Polšča). Maderavała dyskusiju Alena Markava z Karłavaha ŭniviersiteta (Praha).
Na plenarnym pasiadžeńni byŭ zabiaśpiečany pierakład na biełaruskuju i anhlijskuju movy.
Siońnia i zaŭtra adbudziecca praca šmatlikich siekcyj, pryśviečanych raznastajnym temam: ad stratehičnych enierhietyčnych prajektaŭ da siužetaŭ, źviazanych sa 100-hodździem abviaščeńnia BSSR, jakoje čyrvonaj nitkaj prachodzić praz histaryčnyja dyskusii sioleta. Prahramu možna pračytać tut.
Asabliva cikavymi dla šyrokaj publiki mohuć być viečarovyja dyskusii i knižnyja prezientacyi ŭ subotu. Na žal, jany adbuducca paralelna, u 17.00.
Tak, u aŭdytoryi 110 EHU budzie mieć miesca dyskusija: «Palityčnaja reforma i tranzit ułady: scenaryi, mahčymaści i ryzyki. Biełaruś i dośvied inšych postsavieckich krain».
Maderatar: Arciom Šrajbman (Biełaruś)
Udzielniki: Andrej Kazakievič (Biełaruś), Valer Karbalevič (Biełaruś), Piotr Piatroŭski (Biełaruś),
Mirzakid Rachimaŭ (Uźbiekistan), Ajdarchan Kusainaŭ (Kazachstan), Rachim Rachimaŭ (Azierbajdžan).
Cyrymonija ŭručeńnia premij Kanhresa projdzie hetym razam u Ratušy a 19-j hadzinie (vulica Vialikaja, 31). Paśla jaje, a 20-j hadzinie, adbudziecca dyskusija na temu pierapachavańnia Kalinoŭskaha z udziełam doktara histaryčnych navuk Alesia Smalenčuka i redaktara «Našaj Nivy» i «Našaj historyi» Andreja Dyńko.
Ahułam Kanhres — heta mahčymaść pabačyć i pačuć daśledčykaŭ z roznych krain i halin i pahruzicca ŭ atmaśfieru žyvoj navuki.
