Biełaruskaja naftavaja kampanija (BNK) u 2019 hodzie maje namier zachavać ekspart naftapraduktaŭ na letašnim uzroŭni 11 młn ton, niahledziačy na prypynieńnie prodažaŭ u krasaviku-mai z-za pastavak zabrudžanaj chłarydami rasijskaj nafty. Pra heta zajaviŭ namieśnik hiendyrektara BNK Siarhiej Hryb na mižnarodnaj kanfierencyi «Rynak naftapraduktaŭ i hazu Respubliki Biełaruś: vytvorčaść, trejdzinh, roźnica», piša tut.by.
Što tyčycca 2020 hoda, dyk BNK, jakaja źjaŭlajecca śpieceksparcioram biełaruskich naftapraduktaŭ, płanuje zachavać abjom prodažaŭ na ŭzroŭni biahučaha hoda. Adnak napramki pastavak mohuć trochi źmianicca.
Krainy Bałtyi
Pavodle papiarednich acenak BNK, u 2019 hodzie praz party Łatvii i Estonii budzie pastaŭlena sumarna 4,6 młn ton biełaruskich naftapraduktaŭ, praź Litvu - 1,4 młn ton. U 2020 hodzie situacyja moža być nastupnaj: praź Litvu sydzie 2 młn ton, praz Łatviju i Estoniju - 4 młn ton.
«U 2020 hodzie prahnazujem, što pavialičym pastaŭki praź Litvu. U napramku Łatvii i Estonii pastaŭki trochi pamienšacca. Heta źviazana z taryfnaj palitykaj prybałtyjskich partoŭ», - skazaŭ Hryb i padziakavaŭ pasłu Litvy ŭ Biełarusi za jaho «aktyŭnuju pazicyju pa prasoŭvańni intaresaŭ» svajoj krainy, ale ŭ toj ža čas, kab «kirunak Litvy byŭ dastatkova cikavym dla Biełarusi».
Alaksandr Łukašenka, pryznačajučy ŭ vieraśni 2018 hoda Vasila Markoviča pasłom Biełarusi ŭ Łatvii, daručyŭ zabiaśpiečyć bieśpieraškodny vychad da mora. «Kali Litva nie vielmi choča z nami supracoŭničać, tak treba rabić upor na Łatviju», - skazaŭ jon. Uletku hetaha hoda dypłamat daŭ spravazdaču pra vizity šmatlikich delehacyj ź Biełarusi ŭ Łatviju i zajaviŭ pra namier biełaruskich kampanij pastaŭlać hruzy praz party Ryhi, Vientśpiłsa i Lijepai.
Łatvija zaŭsiody kankuravała ź Litvoj za biełaruskija hruzy. Ale z-za taho, što Vilnia niehatyŭna nastrojeny ŭ adnosinach da BiełAES, biełaruskija ŭłady stali bolš aktyŭna šukać šlachi da mora praz Łatviju, niahledziačy na toje što Kłajpieda znachodzicca bližej da Biełarusi. «Ale łahistyčnyja pieravahi, pra jakija kažuć litoŭskija partniory, nie tak vidavočnyja - kali padyści kompleksna i ŭličvać usie składniki, umovy łatvijskaha boku mohuć być vielmi i vielmi pryvabnyja», - adznačaŭ Vasil Markovič.
Ukraina
Samy pryvabnym i abjomnym dla Biełaruskaj naftavaj kampanii źjaŭlajecca ŭkrainski rynak. Štomiesiac va Ukrainu pastaŭlajecca 250-300 tys. ton biełaruskich naftapraduktaŭ. «U žniŭni my pastavili ŭ Ukrainu 300 tys. ton, u vieraśni budzie 250 tys. ton», - skazaŭ Siarhiej Hryb.
Niadaŭna na ŭkrainskim rynku dyzpaliva paŭstała napružanaść z-za prypynieńnia prapampovak pa naftapraduktapravodzie «PrykarpatZachadtrans» i składanaściami z pastaŭkami impartnaha paliva pa čyhuncy i pa mory. Ukraina ŭviała śpiecyjalnaje myta na impart dyzpaliva pa hetym trubapravodzie, asnoŭnaja dola paliva była z Rasii. «PrykarpatZachadtrans» kantralujuć struktury, źviazanyja z asiarodździem «kuma Pucina», ukrainskaha palityka Viktara Miedviedčuka, i biełaruskaha biznesmena Mikałaja Vierabja.
Ci hatovaja BNK naroščvać pastaŭki pa hetym naftapraduktapravodzie? Vyśvietliłasia, što niadaŭna biełaruskaja kampanija prapampavała pa «trubie» «PrykarpatZachadtransa» 8 tys. ton naftapraduktaŭ.
«Ja [hety naftapraduktapravod] baču jak adzin z dadatkovych abo alternatyŭnych vidaŭ transpartu dla pastavak naftapraduktaŭ va Ukrainu. Užo pastaŭlali pa race, aŭtatranspartam, pa čyhuncy. Ci budziem dalej pastaŭlać pa «trubie»? Pahladzim. Hetaje pytańnie abmiarkoŭvajecca, usio zaležyć ad umovaŭ», - adkazaŭ Siarhiej Hryb.
«Budučynia zaležyć ad taho, ci budzie admieniena myta ci nie. Chto - pakupnik abo pastaŭščyk - budzie hatovy płacić myta. Kali rynak vyznačycca pa hetym pytańni, tady i abjomy pastavak buduć zrazumiełyja», - dadaŭ jon.
