35-hadovaja Julija Hanisieŭskaja, jakaja vyłučajecca kandydatam na parłamienckija vybary ad «Havary praŭdu» pa 36-j Homielska-Navabielickaj akruzie, padzialiłasia ŭ fejsbuku evalucyjaj svajho śvietapohladu.

«Ź dziacinstva mianie vučyli, što krušeńnie Savieckaha Sajuza — heta trahiedyja, što ŭsie ludzi žyli dobra, a ciapier stali žyć drenna. Tamu, kali adbylisia padziei 2014 va Ukrainie — Majdan, dałučeńnie da Rasii Kryma, hramadzianskaja vajna na Danbasie z udziełam mnohich dobraachvotnikaŭ ź inšych krain SND, u tym liku i ź Biełarusi, — ja pa-durnomu i naiŭna dumała, što, moža być, tak adnaŭlajecca toj Saviecki Sajuz, jaki dobry, pravilny dla ludziej, što ŭśled za Krymam i Ukraina dałučycca», — piša Hanisieŭskaja.

Jana kaža, što była na baku tych, chto radavaŭsia viartańniu Kryma «ŭ rodnuju havań», i była na baku danbascaŭ, jakija «paŭstali suprać banderaŭcaŭ».

«Ja adkryta pryznaju, što była ŭładalnicaj «marharynavych mazhoŭ» i lohka paddałasia manipulacyjam z «raśpiatymi na kryžach niemaŭlatami» i sotniami zhvałtavanych žančyn. Ja, jak i mnohija ludzi, sapraŭdy ŭ heta vieryła. Tak, ja idyjotka», — zaznačaje Hanisieŭskaja.

Ale praź niejki čas jana zrazumieła, što pamylałasia. «U vyniku ja zrazumieła, što mocna padmanvałasia, što za čas, pakul my žyli za svojeasablivaj žaleznaj zasłonaj rasiejskaj prapahandy, va Ukrainie adbyłosia vielmi šmat pazityŭnych pieraŭtvareńniaŭ, reformaŭ, što sama ciapierašniaja madel Ukrainy značna bolš zdarovaja dla hramadstva, jakoje choča harmanična žyć», — ličyć kandydatka.

Hanisieŭskaja piša, što joj soramna praz toje, što jana vieryła ŭ «krymnaš». Jana adznačaje, što napisała hety post tamu, što kožny dzień joj niechta nahadvaje pra raniejšyja pohlady.

«Da ŭkrainskaha nacyjanalizmu, jak i da luboha inšaha, ja staŭlusia pa-raniejšamu admoŭna. I hetaha nie chavaju. Nichto nikomu nie pavinien naviazvać svajo bačańnie historyi Vialikaj Ajčynnaj abo na jakoj movie jamu havaryć i ŭ jakuju carkvu chadzić. A našy narody, jakija stahodździami žyli pad adnym dacham, pavinny žyć u miry i siabroŭstvie, zasnavanym na raŭnapraŭi i ŭzajemapavazie našych krain», — skančvaje pradstaŭnica «Havary praŭdu» svoj dopis.

Julija Hanasieŭskaja pracuje kucharam 4 razradu mahazina №33 «Minimarkiet» handlovaj kampanii «Alesia».

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?