Namieśnik kiraŭnika ŭpraŭleńnia kultury Minharvykankama Alaksandr Šastakoŭ źviarnuŭsia ŭ milicyju, kab taja pravieryła adpaviednaść zakanadaŭstvu muzyčnaha kancerta Symbal.by.Fest, jaki prachodziŭ 23 žniŭnia na placoŭcy «Piasočnicy». Pra heta «NN» raskazaŭ ułaśnik kramy Symbal.by Pavieł Biełavus.
Fest da dnia naradžeńnia «Symbala» byŭ biaspłatnym. Na im vystupali Naviband i «Dzieciuki». Na kancert pryjšło niekalki tysiač čałaviek.
Šastakoŭ pryjšoŭ u «Piasočnicu» z pravierkaj adrazu paśla taho, jak stała viadoma pra praviadzieńnie fiestyvalu. Maŭlaŭ, čamu heta jany pravodziać mierapryjemstvy biez dazvołu Minharvykankama.
Biełavus prapanavaŭ Šastakovu sustrecca, toj pahadziŭsia. «Šastakoŭ skazaŭ, što da nas niama pretenzij, ale my pavinny prytrymlivacca zakanadaŭstva», — raskazvaje Pavieł.
Biełavus tłumačyć, što pavodle Kodeksa ab kultury (punkt 7 artykuła 213) nijakija paśviedčańni i dazvoły nie patrebnyja dla arhanizacyi kulturnych mierapryjemstvaŭ, jakija prachodziać biez atrymańnia prybytku.
«Ja spytaŭ u Šastakova, ci pravilna ja razumieju zakanadaŭstva. Jon adkazaŭ, što nie ŭ jaho abaviazkach tłumačyć nam zakony», — raskazvaje Biełavus.
Užo paśla praviadzieńnia festu Biełavusa vyklikali dla pravierki ŭ milicyju. Pravaachoŭniki paviedamili, što im pryjšła skarha ad upraŭleńnia kultury Minharvykankama. Haradskija ŭłady prasili pravieści rasśledavańnie pa fakcie praviadzieńnia niezakonnaha masavaha mierapryjemstva.
U milicyi Centralnaha rajona Minska praviali pravierku, ale nijakich pravaparušeńniaŭ nie znajšli.
«My ź Biełavusam abmierkavali ŭsie pytańni. Jon u pravie vynosić heta na razhlad hramadskaści. My sapraŭdy sustrakalisia, havaryli pra praviadzieńnie tych ci inšych mierapryjemstvaŭ. Usio inšaje — heta miž nami», — prakamientavaŭ «NN» Alaksandr Šastakoŭ.
Alaksandr Šastakoŭ. Fota z facebook.com.
«Ja ŭpieršyniu sustreŭsia z čynoŭnikam, jaki, zdajecca, małady, pavinien być sučasnym, a havaryŭ takimi kancylarskimi štampami, što było zusim niemahčyma znajści ahulnuju movu.
A jašče ja siońnia ŭbačyŭ, što my siabry Ukantakcie, i jon padpisany na staronki i Art-Siadziby, i MKB, i «Dzieciukoŭ». Dyk navošta padavać było ŭ milicyju skarhu na nas, ja nie razumieju. Kab pierastrachavacca?» — narakaje Pavieł Biełavus.
