Čatyry čałavieki praviali pikiet suprać zakonu ab adterminoŭkach ŭ Tučynskim skvery na Charkaŭskaj vulicy ŭ Miensku, piša «Radyjo Svaboda».

Pikietoŭcy trymali plakaty, a taksama raspaviadali minakam pra sutnaść zakonu i jaho nastupstvy. Jany vyhukvali lozunh «Vučoba — važniej!».

Pieršymi na miesca praviadzieńnia pikietu pryjšli try milicyjanty ŭ cyvilnym, a taksama pryjechała bryhada chutkaj dapamohi. Pierad pačatkam akcyi milicyjanty pravieryli, što było napisana na plakatach. A paśla jaje nahadali, što pikietoŭcy ciaham dziesiaci dzion pavinny zapłacić 76,5 rubla za «pasłuhi milicyi». Rachunki taksama vystaviła «chutkaja» i «Zielanbud».

«My paličyli, što ahułam vyjšła bolš za 150 rubloŭ, to bok adna chvilina kaštavała prykładna 2,5 rubla. — skazaŭ karespandentu Svabody adzin ź pikietoŭcaŭ Radyjon, jaki vučycca ŭ mahistratury BDUIR. — Aficyjna zajaŭlenaja nami meta akcyi — prainfarmavać ludziej pra zakon ab adterminoŭkach. Ale my chacieli jašče pakazać, nakolki absurdnyja patrabavańni zakonu adnosna praviadzieńnia vuličnych akcyj. Nas čaćviora, a ŭ dva razy bolš achovy, «chutkaja dapamoha», pavinny pryjechać prybiralščyki. I taksama my chočam pakazać, što akcyju možna pravieści i nichto nie atrymaje štrafu i nia trapić u aŭtazak».

Pavodle Radyjona, u ramkach kampanii «Vučoba važniej!» u Miensku padadziena jašče 13 zajavak na praviadzieńnie pikietaŭ suprać zakonu ab adterminoŭkach. Akcyi planujuć na kaniec žniŭnia — pačatak vieraśnia. Taksama dźvie zajaŭki padadzienyja ŭ Voršy i adna ŭ Mahilovie.

«My patrabujem admianić zakon ab adterminoŭkach, jak minimum, źmianić jaho, kab pradstaŭlałasia adterminoŭka na kožnuju stupień adukacyi. Chočam takim čynam zachavać bieśpierapynnaść adukacyi. Kali my damožamsia vykanańnia hetych našych patrabavańniaŭ, budziem vystupać za reformu vojska, palapšeńnie ŭmovaŭ prachodžańnia słužby, kab ludzi byli ŭ hetaj spravie matyvavanyja. Bo kali zahaniać ludziej u vojska z-pad pałki, kali nie ličycca ź ich intaresami, pierakručvać ich plany, to pra jakuju jakaść abarony radzimy moža iści havorka?» — skazaŭ Radyjon.

Alaksiej, jaki vučycca ŭ BDUIR, skazaŭ, što biare ŭdzieł u pikiecie, bo zakon ab adterminoŭkach parušaje jaho pravy.

«Treba niešta mianiać. Mahčyma, niašmat karyści ad našych dziejańniaŭ, ale my chočam pakazać astatnim, što možna pryjści i vykazacca. Heta meta dasiahnutaja, i mianie heta raduje».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?