Niahledziačy na praliŭny doždž, dziasiatki tysiač čałaviek vyjšli ŭ niadzielu na vulicy Hankonha dla ŭdziełu ŭ čarhovaj antyŭradavaj akcyi, pieradaje «Hołas Amieryki».
Heta ŭžo adzinaccatyja vychadnyja zapar, kali demanstranty vychodziać na vulicy, vykazvajučy svajo abureńnie.
Akcyi pačynalisia jak mirnyja pratesty suprać zakonaprajekta ab ekstradycyi, jaki dapuskaŭ vydaču padazravanych u kryminalnych złačynstvach materykovamu Kitaju, dzie sud nad imi prachodziŭ by ŭ nieprazrystaj pravavoj sistemie.
Z tych časoŭ pratesty pieraraśli ŭ ruch za demakratyčnyja reformy.
Pratesty nosiać mirny charaktar, ale časam adbyvajucca sutyčki aktyvistaŭ z palicyjaj.
«My spadziajemsia, što siońnia nie budzie nijakich chaatyčnych situacyj», — zajaviła arhanizatar akcyi Boni Lun.
Praca nad zakonam ab ekstradycyi była prypynienaja, ale pratesty praciahvalisia praz zaniepakojenaść žycharoŭ Hankonha erozijaj svabod, harantavanych ŭ adpaviednaści z pryncypam «adna kraina, dźvie sistemy», jaki dziejničaje z tych časoŭ, jak hetaja terytoryja była viernutaja Vialikabrytanijaj Kitaju ŭ 1997 hodzie.
Kitajskija vajenizavanyja farmavańni prachodziać padrychtoŭku ŭ Šeńčženie, jaki miažuje z Hankonham. Heta vyklikaje zaniepakojenaść, što Piekin hatovy ŭvieści vojski, kab zadušyć pratesty.
Palicyja Hankonha nastojvaje, što sama zdolnaja spravicca z demanstrantami.
Demanstracyi ŭ aeraporcie Hankonha, jakija pačalisia na minułych vychodnych, praciahnulisia i ŭ nastupnyja pracoŭnyja dni, u vyniku čaho adna z samych zahružanych pavietranych havaniaŭ śvietu była paralizavanaja niekalki dzion. Heta pryviało da sutyknieńniaŭ pamiž demanstrantami i palicejskim śpiecnazam.
