Barysaŭski BATE startavaŭ u Lizie čempijonaŭ siezona 2019/2020. U supierniki čempijonu Biełarusi dastaŭsia nie samy prosty kłub, a mienavita pieramožcy polskaha pieršynstva — «Piast» z horada Hlivic.

Pikantnaści supraćstajańniu dadavaŭ toj fakt, što fanaty BATE ŭžo vielmi daŭno siabrujuć z fanatami «Piasta». Na siektary barysaŭcaŭ zaŭsiody možna pabačyć emblemu polskaj kamandy, toje samaje adbyvajecca i ŭ Hlivicach.

I da sustrečy na «Barysaŭ-Arenie» fanaty padrychtavali jarki pierformans, a mienavita na fan-siektary BATE byŭ uźniaty vializny banier z nadpisam pa-biełarusku «Siabroŭstva važniejšaje za pieramohu». Niekalki razoŭ ź siektara žoŭta-błakitnych było čuvać «Piast, Piast».

Na pieršy matč u Barysavie na trybunach sabrałasia bolš za 11 tysiač čałaviek. Dziŭna, što nie było anšłahu, chacia cana na bilety zusim nie kusałasia (4—11 rubloŭ). Zrešty, navat i tak padtrymka kamandzie była zabiaśpiečanaja na ŭzroŭni.

Užo ŭ samym pačatku hulni, ličy na roŭnym miescy, złamaŭsia centralny abaronca BATE Jahor Filipienka. Heta toj čałaviek, vakoł jakoha i budujecca hulnia kamandy na zadniaj linii. Na žal, u budučyni heta nie vielmi dobra adhukniecca dla našaha čempijona.

Pieršy tajm, było ŭražańnie, kamandy ŭvohule chacieli adhulać bieź niebiaśpiečnych momantaŭ la abodvuch varotaŭ. Asabliva ŭ hetym płanie staraŭsia BATE. Pieršy sapraŭdy vostry momant u haspadaroŭ uźnik tolki na 33-j chvilinie, kali Stasievič atrymaŭ miač u štrafnoj. Paŭabaronca prybraŭ na zamachu abaroncu, ale niejkim čynam toj usio adno zmoh błakiravać udar.

Faktyčna ŭžo ŭ nastupnaj atacy «Piast» zmoh zabić. Kali z udaram ispanskaha lehijaniera Chorchie Harsii bramnik biełarusaŭ Čyčkan spraviŭsia, to na dabivańni Piatru Pažyšeku nie było kamu pieraškodzić. Jon hałavoj prabiŭ miač prosta pa centry varot — 0:1.

Kali zirnuć na statystyku ŭdaraŭ pa varotach za pieršy tajm, to dla BATE jana prosta katastrafičnaja — 1:10. Chacia na spravie nie skažaš, što «Piast» až nastolki daminavaŭ na poli.

Druhi tajm padnačalenyja Alaksieja Bahi pačali značna viesialej. U vyniku jany zmahli «padsadzić» na žoŭtyja kartki adrazu troch hulcoŭ čempijona Polščy. Hulcy «Piasta», jakija zusim niadaŭna vyjšli z adpačynku, prosta nie paśpiavali za chutkimi chłopcami ŭ žoŭtaj formie.

U vyniku pieravaha BATE ŭsio ž dała pra siabie viedać. Na 64-j chvilinie hulni vyrašalnaj akazałasia jakraz chutkaść. Fantastyčny zabieh pa levaj broŭcy prademanstravaŭ Ihar Stasievič. Jon zmoh prastrelić u štrafnuju, dzie na pieradaču adhuknuŭsia Stas Drahun. Jahony ŭdar u daloki kut pa svajoj dakładnaści byŭ daskanałym — 1:1.

Potym, na žal, BATE znoŭ niejak adcisnuŭsia na svaju pałovu pola. Adnojčy Čyčkan pakazaŭ vydatnaje majsterstva paśla strełu hulca «Piasta». Na apošniaj chvilinie hulni da čyrvonaj kartki dahulaŭsia paŭabaronca BATE Stanisłaŭ Drahun. Bieź jaho ŭ Polščy našaj kamandzie budzie nadzvyčaj ciažka.

Hulnia ŭ apošnija chviliny pierarastała ŭ sapraŭdnuju bojku. Nie duža ŭdałaje sudziejstva taksama hetamu dapamahała. Jadnańnie na trybunach miž fanatami, a voś hulcy miž saboj pieramohi jaŭna nie padzialili.

Matč tak i skončyŭsia ź ničyjnym likam 1:1. Hulnia ŭ adkaz adbudziecca ŭ Hlivicach 17 lipienia, pačniecca jana a 21 hadzinie pa minskim časie. U Polščy BATE treba abaviazkova pieramahać, albo hulać uničyju minimum 2:2.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?