Prezident Ukrainy Uładzimir Zialenski pryznačyŭ Juliju Miendel svaim pres-sakratarom. Žurnalistka pracavała na niekalkich ukrainskich telekanałach, supracoŭničała ź viadomymi amierykanskimi vydańniami.
Julija Miendel naradziłasia 3 vieraśnia 1986 hoda ŭ Chiersonskaj vobłaści. Vučyłasia ŭ Kijeŭskim nacyjanalnym univiersitecie imia Tarasa Šaŭčenki. Jość stupień kandydata fiłałahičnych navuk.
Stažyravałasia za miažoj u ramkach prahramy Salidarnaści imia Lecha Valensy, skončyła Varšaŭskuju jeŭraatłantyčnuju akademiju (WEASA).
Pracavała žurnalistkaj na telekanałach ICTV, Espreso.TV, 112 Ukrajina i Intier. Pracavała z takimi amierykanskimi vydańniami, jak Wall Street Journal, New York Times, a taksama z telekanałam CNN.
U 2016 hodzie prachodziła treninh u Jelskim univiersitecie, što, pa jaje słovach, stała pierałomnym momantam u jaje žurnalistkaj karjery.
Miendel taksama supracoŭničała z šeraham takich zamiežnych vydańniaŭ i telekanałaŭ, jak Politico Europe, VICE News, CNBC, New Eastern Europe, World Affairs Journal, Spiegel Online.
Zaraz supracoŭničaje z New York Times. Taksama Miendel kaardynatar pa suviaziach ź miedyja pradstaŭnictva Suśvietnaha banka va Ukrainie.
Reziumie dla ŭdziełu ŭ konkursie na pasadu pres-sakratara Uładzimira Zialenskaha Julija Miendel adpraviła na nastupny dzień paśla jaho abviaščeńnia — 1 maja. U konkursie brali ŭdzieł kala čatyroch tysiač čałaviek.