Biełaruskija vytvorcy, pa dadzienych Biełstata, za studzień—sakavik pradali za miažu amal 57,8 tysiačy ton syroŭ i tvarahu. Dla paraŭnańnia, za anałahičny pieryjad minułaha hoda kraina ekspartavała 46,6 tysiačy ton. U pieršym kvartale sukupny ekspart syroŭ i tvarahu skłaŭ 225,7 miljona dalaraŭ.
Asnoŭnym rynkam biełaruskich syroŭ i tvarahu zastajecca Rasija. Na jaje prychodzicca 94,2% ekspartu, što prynosić amal 212 miljonaŭ dalaraŭ. Pastaŭki padraśli ŭ naturalnym vyražeńni na 22,2%, a ŭ vartasnym — na 16,6%.
Akramia Rasii i krain SND, biełaruskija syry i tvaroh pradajucca taksama ŭ Bałharyi, Hruzii, Iardanii, Kitai, Łatvii, AAE, ZŠA i Japonii. Rynak ekspartnych pastavak tvarahu i syroŭ adnaho tolki «Savuškava pradukta» — bolš za 15 krain śvietu.
Pa dadzienych Jeŭrapiejskaj kamisii, Biełaruś zaniała čaćviortaje miesca ŭ śviecie siarod krain-eksparcioraŭ syru pa vynikach pieršaha kvartała. Na pieršym miescy — Jeŭrasajuz, jaki za try miesiacy pastaviŭ amal 262 tysiačy ton syru. Druhoje miesca ablubavali ZŠA z 99 tysiačami ton, treciaje — Novaja Ziełandyja (89,8 tysiačy). Nižej biełarusaŭ raźmiaścilisia aŭstralijcy, irancy i šviejcarcy.
Pavodle dadzienych Minsielhascharča, 28% małaka, što vyrablajecca ŭ krainie, idzie na syry. Takija ž praporcyi i ŭ pieradavych krain śvietu. U biełaruskim rytejle pradstaŭlena 330 vidaŭ syroŭ.
U trojku lidaraŭ pa vytvorčaści syru ŭ Biełarusi ŭvachodziać «Savuškaŭ pradukt», «Biarozaŭski SK» i «Turaŭski MK». Hetyja try pradpryjemstvy ŭ sukupnaści vypuskajuć amal tracinu (31,3%) syroŭ u krainie. Z ulikam padkantrolnaha «Savuškavu» Biarozaŭskaha syrarobnaha kambinata hetaj kampanijaj vyrablajecca 24% usich syroŭ.
«My nie zabyvajem pra tradycyjnyja hatunki, ź jakimi znajomyja našy pakupniki ŭžo daŭno. Razam z tym, my praciahvajem udaskanalvać receptury, prymianiać novyja technałohii. I asvojvajem vytvorčaść syroŭ, jakija raniej u Biełarusi nie vypuskalisia, ale na jakija jość stabilny popyt. Za apošnija hady ŭ našaj krainie značna pavialičyŭsia abjom vypusku elitnych hatunkaŭ syru», — kamientujuć u kampanii «Savuškaŭ pradukt».
Na ekspart ź Biełarusi čaściej za ŭsio nakiroŭvajucca hałandskija hatunki syroŭ. Jany ž uvachodziać u lik samych papularnych i ŭ biełarusaŭ. U apošni čas ajčynnyja vytvorcy taksama asvoili vypusk finskaha syru i miakkich tvarožnych krem-syroŭ (Cream Cheese), moda na jakija pryjšła ź Jeŭropy.
