Navošta dzieciam fiłasofskija vieršy i navošta darosłym dziciačyja knihi? Vydaviectva Koska i pierakładčyca Alesia Bašarymava źbirajuć na Vulli srodki, kab vydać knihu pra našych unutranych źviaroŭ. Zastałosia ŭsiaho 9 dzion, kab padtrymać prajekt.
Kniha-karcinka tak i nazyvajecca — «Źviary, jakich nichto nie bačyŭ, aproč nas». Našaje ja — jakoje jano? Kałmataje i złoje, miakkaje i puchnataje, niaščasnaje ci trapiatkoje? Ci mianiajecca jano ŭ roznych situacyjach? Vybitnyja aŭtary — šviedski piśmieńnik Ulf Stark i finskaja ilustratarka Linda Bundestam stvaryli niezvyčajnuju dziciačuju knihu, dzie humar spałučajecca z hłybinioj dumak.
Ulf Stark i Linda Bundestam.
Aŭtary ŭžo viadomyja ŭ biełarusi pa dziciačaj knizie «Dyktatar», jakaja vyjšła ŭ 2012 hodzie ŭ pierakładzie Volhi Ryźmakovaj i Nasty Łabady. Tady Ulf Stark pryjazdžaŭ u Minsk dy Mahiloŭ sustrakacca z čytačami. Jaho ŭraziŭ ciopły pryjom, pra jaki jon šmat raskazvaŭ Lindzie Bundestam.
Na žal, dva hady tamu Ulfa Starka nie stała. Ale jaho knihi praciahvajuć žyć i vandravać pa śviecie. Kniha pra Źviaroŭ pakul vychodziła ŭ pierakładach tolki na narviežskuju, dackuju i finskuju. Biełaruś moža stać nastupnym punktam u jaje padarožžy pa śviecie.
Knihu pierastvaryła pa-biełarusku pierakładčyca Alesia Bašarymava, viadomaja pa pierakładach mumitrolaŭ Tuve Jansan, «Śniežnaha čałavieka» Evy Susa, «Najlepšaha śpievaka ŭ śviecie» Ulfa Nilsana, paezii nobieleŭca Tumasa Transtromiera, finskaj paetki Edyt Sioderhran dy inšych.
Pierakładčyca Alesia Bašarymava (sprava) i zasnavalnica vydaviectva Koska Nadzieja Kandrusievič.
— Jak tolki ja ŭ 2016 hodzie ŭbačyła anons pra vychad knihi, to zachacieła jaje pačytać i prymierycca, ci zachaču ŭziacca jaje pierakłaści, - raskazała Alesia. - Ja pryniała hety vyklik i za hod jaje pierakłała. Źviary začaroŭvajuć, bo paznaješ u ich siabie i inšych. Heta našyja ŭnutranyja źviary — isnaści, našyja adčuvańni, nastroi, charaktary. Aŭtar nikoha ź ich nie asudžaje, ale vučyć nas zaŭvažać usiu hetuju raznastajnaść, vučyć empatyi i spahadzie.
Paznajomciesia ź biełaruskimi ipastasiami hetych źviaroŭ: Śpiačkur źbiraje vodary vosieni, a ŭ śnie bačyć soniejka i zielanieje ad ščaścia; Krakaviak hołasna śpiavaje, pierakryvajučy mizernadziubyja piski drobnaha ptastva; Čššš usiaho baicca i chavajecca hłyboka pad ziamloj, ale raz na hod tak raźjušvajecca, što sam moža napałochać luboha; Kłypantropka takaja vializnaja, što ciažka kłypaje pa ziamli i pchaje ŭ rot usio navokał, ale maryć być lohkim matylkom.
Kalarovyja vobrazy hetych źviaroŭ stvaryła finskaja ilustratarka Linda Bundestam. Spačatku jana sprabavała znajści natchnieńnie ŭ muziejach pryrody roznych krain, ale ŭsie vystaŭlenyja tam čučały pačali jaje pryhniatać. I tady jana pasprabavała nazirać za naviednikami hetych muziejaŭ i sprabavać razhledzieć ich unutranych źviaroŭ. Sprava pajšła! U vyniku atrymałasia kniha ŭ paŭsotni staronak, pryčym usie razvaroty jarka i hustoŭna ilustravanyja ŭ cikavaj źmiašanaj technicy.
— Ja paznajomiłasia ź Lindaj padčas vandroŭki pa Finlandyi, jakuju ja sabie zładziła da stahodździa Tuve Jansan u 2014 hodzie. Linda razam ź dziciačymi piśmieńnicami Stełaj Parłand i Anikaj Sandelin zładziła nievierahodna viasiołyja pastanoŭki pa knihach-karcinkach Tuve ź cikavym rekvizitam. Ja jašče tady prapanavała Lindzie, jak budzie mahčymaść, zavitać ź jakim-niebudź takim pierformansam u Biełaruś, i jana skazała, što była b radaja ŭ nas pabyvać. Pra krainu i ŭdziačnuju publiku jana ŭžo čuła ad Ulfa Starka. My spadziajomsia, što prajekt źbiare patrebnuju sumu, bo tady my zaprosim da nas Lindu z vystupami, majstar-kłasami i vystavaj ilustracyj z knihi.
Kniha vartaja, kab ź joj paznajomilisia biełaruskija dzieci i darosłyja. Pradumanyja i prafiesijna zroblenyja ilustracyi dapamohuć sfarmavać hust, vieršy ź cikavaj rytmikaj i kali-nikali niečakanaj rasstanoŭkaj ryfmaŭ navučać usprymać roznyja formy paezii, a sami źviary sa svaimi maleńkimi historyjami padorać bahata nahodaŭ dla razvah, dla hutarak baćkoŭ i dzietak.
Inakšy
INAKŠAHA ŭ sabie našu
pad jarkim apiareńniem.
Jon časam uzdymaje šum:
«Puści, prašu!
Puści, prašu!»
Jon brydki i strašenny.
Jon, peŭna, mnie nie kreŭny.
Vydaviectva KOSKA ładzić kraŭdfandynh-kampaniju ŭpieršyniu. Jaho zasnavalnica Nadzia Kandrusievič kaža: «Kniha Ulfa Starka i Lindy Bundestam «Źviary, jakich nichto nie bačyŭ, aproč nas» — niezvyčajnaja i vielmi pryhožaja i tekstami, i malunkami. U joj pakazvajecca prykład raznastajnaści i inšaści. Heta vielmi važnaja reč — prymać i bačyć raznastajnaść i inšaść u sabie i ludziach navokał. Našaje vydaviectva pakul zusim maleńkaje, i knihi vychodziać nie tak chutka. Kab kniha pra Źviaroŭ źjaviłasia bližejšym časam, nam vielmi patrebnaja vašaja padtrymka».
Aŭtarki prajekta prapanoŭvajuć pieradzamović knihu pa vyhadnym košcie abo vybrać łot na svoj hust: jość tut i suvienirnaja ihralnaja karta ad Lindy Bundestam, na jakoj jana namaluje vašaha ŭnikalnaha źviera; jość mahčymaść trapić u hości da vydaviectva ci sustrecca ź pierakładčycaj knihi za kavaj; vy možacie nabyć knihi ŭ dziciačyja damy i biblijateki abo stać sponsaram vydańnia.
Knihu možna padtrymać da ranicy 8 červienia. Kali prajekt naźbiraje ŭsiu sumu, uvosień kniha vyjdzie pa-biełarusku. Kali ž suma nie naźbirajecca, kraŭdfandynh-placoŭka viernie hrošy ŭsim, chto padtrymaŭ prajekt.
Prajekt užo naźbiraŭ 41 % dziakujučy amal sotni zacikaŭlenych. Dałučajciesia i vy — dapamožam razam hustoŭnaj i vartaj knizie sustrecca ź biełaruskimi čytačami.
