U rasijskim pasolstvie ŭ Minsku pieršym sakratarom pracuje Andrej Klincevič — syn rasijskaha palityka Franca Klinceviča. Ź niadaŭniaha času Andrej Klincevič paznačany jak v.a. kiraŭnika pradstaŭnictva Rassupracoŭnictva ŭ Biełarusi.
Andrej Klincevič.
Franc Klincevič naradziŭsia ŭ Ašmianach (Hrodzienskaja vobłaść), ale za čas słužby na terytoryi Rasii adčuŭ siabie ruskim.
Franc Klincevič słužyŭ u Afhanistanie i paśla ŭznačaliŭ adzin ź vieteranskich sajuzaŭ. U rasijskim parłamiencie jon zasiadaŭ z 1999 da 2015 hh., pryčym adnojčy bałatavaŭsia ad Čačni. Zatym źjaŭlaŭsia členam Savieta Fiederacyi ad Smalenskaj vobłaści.
Syn Franca, Andrej, taksama pačynaŭ vajskovuju karjeru, jak i baćka, słužyŭ u desancie.
Z-za traŭmy śpiny syšoŭ sa słužby, ale, zdajecca, nie kančatkova: ukrainskija ŚMI nie raz zhadvali jaho ŭ niehatyŭnym kantekście i adznačali častyja vizity na akupavanuju terytoryju Kryma i na Danbas.
Andrej Klincevič trapiŭ u bazu «Miratvorca» jak asoba, datyčnaja da złačynstvaŭ na terytoryi Ukrainy.
Z ruk Pucina jon atrymaŭ hramatu jak čałaviek, jaki asabliva adznačyŭsia padčas krymskaj kampanii.
Apošnija hady Klincevič-małodšy pracavaŭ razam ź Michaiłam Babičam u aparacie pradstaŭnika prezidenta Rasii ŭ Pryvołžskaj fiederalnaj akruzie.
Niepasredna da pryjezdu ŭ Biełaruś Andrej Klincevič zajmaŭsia kuratarstvam «vajenna-patryjatyčnych kłubaŭ «Adzinaj Rasii».





