Armienija zaćvierdziła pradstaŭlenaha Biełaruśsiu kandydata na pasadu hienieralnaha sakratara Arhanizacyi Damovy ab kalektyŭnaj biaśpiecy (ADKB). Pra heta paviedamlaje vydańnie News.am sa spasyłkaj na pres-słužbu ŭrada Armienii.
Z 1 studzienia 2020 hoda dziaržaŭny sakratar Rady biaśpieki Biełarusi Stanisłaŭ Zaś pa pryncypie ratacyi prystupić da vykanańnia abaviazkaŭ hienieralnaha sakratara ADKB. Ab uchvaleńni jaho kandydatury premjer-ministr Armienii Nikoł Pašynian zajaviŭ padčas vizitu Zasia ŭ Jerevan.
Jon nazvaŭ dasiahnieńnie damoŭlenaściej «stanoŭčym», padkreśliŭšy, što funkcyjanavańnie ADKB «źjaŭlajecca adnym z najvažniejšych elemientaŭ sistemy biaśpieki Armienii», što robić Jerevan zacikaŭlenym u efiektyŭnaj rabocie arhanizacyi. Taksama jon padkreśliŭ nieabchodnaść zachavańnia bałansu sił u śviecie i rehijonie i vykazaŭ nadzieju, što krainy-členy ADKB buduć dziejničać u adpaviednaści z ducham i litaraj statuta arhanizacyi. «Armienija viernaja hetamu pryncypu», — dadaŭ jon.
Zaś, padziakavaŭšy Pašynianu za adabreńnie svajoj kandydatury i pryjom, paabiacaŭ, što, znachodziačysia na pasadzie hienieralnaha sakratara, jon prykładzie ŭsie namahańni dla raźvićcia supracoŭnictva pamiž dziaržavami — udzielnikami Dahavora, a taksama pavieličeńnia efiektyŭnaści arhanizacyi.
