Hołas Leanida Bartkieviča, adnaho z salistaŭ ansambla «Pieśniary», znajomy miljonam biełarusaŭ. Heta jon śpiavaŭ «Aleksandrynu», «Vieraniku», «Biełoruśsiju». Bartkievič dahetul kiruje adnymi z «Pieśniaroŭ», što ŭtvarylisia paśla śmierci Uładzimira Mulavina. Nižej— niekalki faktaŭ pra jaho.
Sprajektavaŭ kinateatr u centry Minska
Pavodle adukacyi Bartkievič — architektar. Jon vučyŭsia ŭ Minskim architekturnym technikumie i paśpieŭ navat trochi papracavać pa śpiecyjalnaści, pierš čym kančatkova syści ŭ muzyku. Minski kinateatr «Kastryčnik» sprajektavany, miž inšym, pavodle jaho dypłomnaha prajektu.
Chvaliŭsia, što byŭ kachankam Puhačovaj
U adnym intervju Leanid Bartkievič raskazaŭ, jak vandroŭnaja hastrolnaja dola źviała jaho ŭ adnym hateli z uzychodziačaj savieckaj pop-zorkaj Ałaj Puhačovaj. I namiaknuŭ, što jany praviali noč razam. Puhačova ž u adkaz nazyvała Bartkieviča fantazioram.
Ažaniŭsia z alimpijskaj čempijonkaj
Heta była zornaja para: «piaśniar» Leanid Bartkievič i himnastka Volha Korbut.
Navina pra ich šlub sparadžała samyja fantastyčnyja čutki: naprykład, zhodna z haradskoj lehiendaj, Mašeraŭ dazvoliŭ im zhulać viasielle na svajoj dačy ŭ Drazdach.
Hramadzianin Biełarusi i ZŠA
U 90-ja Bartkievič zrabiŭ supolny prajekt ź biełaruska-amierykanskim śpievakom Dančykam.
U kancy 1980-ch Bartkievič ź siamjoj źjechaŭ u ZŠA. Amierykanskaje žyćcio nie skłałasia: z Volhaj Korbut jany raźvialisia, syn trapiŭ u turmu za padrobku dalaraŭ. Praz 11 hadoŭ Bartkievič viarnuŭsia ŭ Biełaruś.
Kaho tolki nie davodziłasia sustrakać! Z Švarceniehieram.
Maje recept, jak pieravieści biełarusaŭ na svaju movu
«Za poŭhoda ŭsie biełaruskija dzieci razmaŭlali b na rodnaj movie absalutna čysta. Paviesiŭ by ŭkožnaj siamji repraduktar na ścienku, i biełaruski kanał tranślavaŭ by z ranicy da viečara. Prymusić dziaciej słuchać my nie zmožam, ale heta budzie adbyvacca mižvolna.
Ja taki ekśpierymient prarabiŭ sa svaimi zaakijanskimi ŭnukami — jany movy nie viedali, a praz try miesiacy zahavaryli tolki tamu, što matčyna mova doŭbić pa hałavie i ŭ joj zatrymlivajecca toje, što treba», — kazaŭ Bartkievič u intervju.