Pa 510 rubloŭ štrafu atrymali jašče dva ŭdzielniki niesankcyjanavanaj akcyi 26 krasavika ŭ Miensku. Mienčukoŭ Juliju Laškievič i Dźmitryja Kučuka, namieśnika staršyni partyi «Zialonyja», abvinavacili ŭ ździajśnieńni pravaparušeńnia, praduhledžanaha artykułam 23.34 KaAP (parušeńnie paradku arhanizacyi abo praviadzieńnia masavych mierapryjemstvaŭ). Pracesy nad imi adbylisia ŭ Centralnym sudzie Miensku, piša «Radyjo Svaboda».
Julija Laškievič raspaviała «Svabodzie» padrabiaznaści pracesu.
«Mianie sudziła Viktoryja Šabunia, a śviedčyli dva milicyjanty. Pryčym adzin ź ich, maładziejšy, dakładna adkazaŭ na pytańnie, ź jakoj nahody adbyłasia akcyja — što ŭ pamiać pra Čarnobylskuju katastrofu. To bok razumiejuć, za što karajuć. Nahadała sudu, što ŭ toj dzień MUS pravodziŭ maleńnie ŭ pamiać pra zahinułych ad Čarnobyla milicyjantaŭ. Ale ž zahinuli nia tolki milicyjanty — pra ich, značyć, havaryć nielha», — kaža Julija Laškievič.
Ci budzie abskardžvać pastanovu sudu, žančyna jašče nia vyrašyła. «Udzieł u šeści ja pryznała, ale viny nie pryznaju».
Dźmitryj Kučuk taksama nie źbirajecca abskardžvać rašeńnie sudu.
Na dadzieny momant viadoma pra pakarańnie 5 udzielnikaŭ akcyi. Aproč Laškievič i Kučuka, heta pensijanerka z Asipovič Taciana Barel (aštrafavanaja na 328,5 rubla), niezaležny ekanamist Siarhiej Čały (328,5 rubla), nieviadomy małady čałaviek ź plakatam, jakoha sudzili ŭ Pieršamajskim sudzie (255 rubloŭ).
Vykanaŭca abaviazkaŭ staršyni AHP Mikałaj Kazłoŭ taksama atrymaŭ dla aznajamleńnia składzieny na jaho pratakoł za 26 krasavika.
«Jašče nie prahladaŭ, na mianie šmat pratakołaŭ», — skazaŭ Svabodzie Mikałaj Kazłoŭ.
«Čarnobylskim šlacham» prajšli kala 30 čałaviek
Na ŭhodki avaryi na Čarnobylskaj AES u Miensku štohod ad 1989 hodu tradycyjna prachodziŭ Čarnobylski šlach — akcyja pamiaci ładziłasia biez udziełu dziaržavy, ale ŭłady amal zaŭsiody dazvalali jaje. Zajaŭku na mitynh i šeście ŭ 2019 hodzie adklikali praź niežadańnie płacić milicyi za abaviazkovuju achovu. Akcyja prajšła niesankcyjanavana, ale zatrymańniaŭ nie było.
