Aktyvistka «Matčynaha ruchu 328» Maryna Maculevič paviedamiła ŭ fejsbuku, što ŭ jaje kanfiskavali techniku i viazuć u Śledčy kamitet. Na jaje nibyta zaviali spravu pa artykule 369 Kryminalnaha kodeksa — «abraza asoby pry vykanańni».
Maryna časova niedastupna dla kamientaroŭ, pres-słužba Śledčaha kamiteta vyśviatlaje abstaviny, kab raskazać pra akaličnaści spravy žurnalistam.
Što viadoma pra Marynu Maculevič?
Hetaja žančyna prezientuje siabie biźnies-trenieram.
U «Matčyn ruch 328» trapiła typova — jaje adzinaha syna Ramana asudzili za raspaŭsiud narkotykaŭ ažno na 14 hod. Hetaje hora zrabiła jaje adnoj z samych zaŭvažnych fihur u ruchu: jana razdała šmat intervju, udzielničała ŭ haładoŭcy pad ścienami Vaładarki.
U svaich publičnych acenkach dziejnaści siłavych orhanaŭ i ŭładaŭ Maculevič davoli rezkaja, u acenkach svajho losu — žałaślivaja.
U pryvatnaści, jana publična raskazvaje pra prablemy siamiejnaha žyćcia, pra suicyd svajoj maci.
«Moj syn byŭ u depresii z-za prablem u asabistym žyćci i biznesie. U pieryjad čornaj pałasy znajomy prapanavaŭ Ramanu rassłabicca i pasprabavać narkotyk. Syn nie viedaŭ, što heta za rečyva.
Potym, kali, jak toj kazaŭ, spadabałasia, skazaŭ, što možna atrymlivać narkotyki darma, akazvajučy pasłuhi dastaŭki.
Voś ciapier čytaješ kamientary pad roznymi intervju maci, asudžanych pa hetym artykule, i tam pišuć: «Treba było vychoŭvać».
A ja vychavała vielmi dobraha syna. Ja vychavała razumnaha, dobraha, talenavitaha čałavieka. Jon apynuŭsia ŭ takoj situacyi, tamu što znachodziŭsia ŭ ciažkim psichałahičnym stanoviščy», — raskazvała Maryna Maculevič u intervju Kuku.orh.
Apošnija paviedamleńni ŭ sacyjalnych sietkach Maryny datyčyli hibieli daišnika ŭ Mahilovie. Žančyna vykładvała davoli śpiecyfičnyja razvahi ŭ duchu: «Kali chłopiec z DAI sapraŭdy tak zrabiŭ [suicyd — Red.], to jon, kaniečnie, hieroj».
Za abrazu asoby pry vykanańni joj moža pahražać da troch hadoŭ abmiežavańnia voli.
